Da la stanza da studegiar 
al home office

Da Fadrina Hofmann*

A chasa èsi il pli bel, hai num. Perquai hai jau dubla fortuna: Jau hai in bel dachasa ed jau lavur er anc davent da chasa. Home office è il term tecnic per mes model da lavur. Sco redactura regiunala da la «Südostschweiz» sun jau responsabla per l’Engiadina e las valladas dal sid. Tranter Cuira e Scuol èn memia bleras muntognas per pendular. Uschia ves jau la chasa da medias da la Somedia be paucas giadas l’onn.

Mes texts naschan en l’anteriura «stanza da studegiar» da mes tat barmier. Jau ma regord bain co ch’el seseva davos in pult da lain massiv stgir, la cigaretta en bucca ed ils mauns sin la tastatura da la maschina da scriver. Jau – ina matta da tschintg, sis onns – seseva davos ina maisina davos el e pudeva dissegnar cun ina da quellas colurs dad ina vart blaua e da l’autra vart cotschna. Mes dissegns da quel temp èn perquai tuts be en blau e cotschen. Mes tat era reverenda e scriveva en stanza da studegiar sias pregias, fascheva sia correspundenza ed aveva qua sia gronda biblioteca. Vi da la paraid pendeva in tarpun da saida cun si segns chinais ed in Chinais gross. Jau aveva in zic tema da quest purtret, ma el era almain inspirant per mes dissegns.

Oz è la stanza da studegiar da tat mes biro. Il pult massiv da lain è sparì, il local è daventà pli cler e na savura betg pli da fim. La maschina da scriver è anc qua, però ella paussa sin il regal da cudeschs – sper gasettas anc betg legidas, cudeschs, ordinaturs plain artitgels e massa documentaziuns davart differents temas che pertutgan l’Engiadina e las valladas dal sid. Il tarpun chinais è era sparì ed ha fatg plazza a fotografias da mes uffants ed ad ina pagina dubla da gasetta cun tut ils collavuraturs da Somedia. Gea, uschia èn mes collegas er in zic qua e sch’insatgi telefona davent da Cuira, lura poss jau guardar sin il placat per savair cun tgi che jau discur insumma. Betg ch’i ma mancass da lavurar en ina redacziun. Na, quell’experientscha hai jau gia fatg.

Sco praticanta hai jau lavurà en ina pitschna redacziun en il chantun da Friburg. Ils collegas eran flots, il lieu da lavur era agreabel, però las uras da biro na vulevan betg finir. Jau lavur magari a moda speditiva e mintgatant eran mes texts per l’auter di gia pronts a mezdi. Tge far anc quatter uras en biro? Jau lavur era gugent en quietezza. A chasa èn l’unica cumpagnia durant il temp da lavur mes chaun e mes giat – tuts dus san cura ch’els han da taschair.

Home office è in regal per mammas che lavuran. Jau sun normalmain a chasa cura che mes uffants turnan da scola. Jau poss far ina runda cun il tschitschapulvra en la pausa da café. Sche mes chau cumenza a fimar dal studegiar prend jau il chaun e vom curt a far ina spassegiada. E sch’in text n’è betg anc terminà a las sis, lura poss jau scriver vinavant cura ch’ils uffants èn a letg. Cler, da lavurar a chasa pretenda disciplina. Jau stoss m’organisar e ma motivar mezza. Però era quai correspunda a mes caracter independent. La fin finala n’emporti betg nua ch’ils texts che cumparan en la gasetta èn vegnids scrits. Il lectur na s’interessa betg sch’il redactur sesa en in biro grond u en l’anteriura stanza da studegiar d’in reverenda. Impurtanta è be la qualitad dal text. E quella è tar mai segir meglra grazia al home office.

* Fadrina Hofmann è redactura regiunala tar la «Südostschweiz» e viva cun sia famiglia a Scuol.