Fin 43% dals giuvenils èn confruntads cun mulestas sexualas

ils 12 da november 2018

Da Lucas Deplazes / ANR

99 procent dals giuvenils tranter 12 e 19 onns han in handy. La novissima tecnica lubescha a la mesadad dals giuvenils in access illimità a films, a la musica ed a gieus digitals. En il center da lur interess èn Netflix, Sportify ed instagram. In terz dispona d’in agen abunament. Il studi James da la Scola auta per psicologia applitgada a Turitg, preschentà venderdi passà a Berna a las medias, dat ina survista represchentativa dal consum da medias dals giuvenils. Per la tschintgavla giada han dumandà ils experts giuvenils tranter 12 e 19 onns davart lur diever da las medias en la Svizra tudestga, en la Svizra franzosa ed en il Tessin. En il Grischun ha participà la scola da Tusaun. Passa milli giuvenils han prendì part dal studi che vegn sustegnì er da Swisscom.

La gronda muntada da las medias

Ils giuvenils svizzers fan oz stedi diever da las medias durant lur temp liber. Els disponan da lur agens meds da communicaziun che lubeschan ina cumposiziun da diever tenor lur giavischs. In trend che conferma l’individualisaziun da l’uman ils ultims onns. Quai dettia dentant differenzas tranter las regiuns cultural-linguisticas, dentant er tranter buobas e mattatschs, han constatà ils experts. Durant duas uras e mez fan ils giuvenils di per di diever da lur smartphon, durant la fin d’emna schizunt durant 4 uras e mesa.

99% dals giuvenils tranter 12 e 19 onns disponan d’in agen handy. 94% dad els èn colliads cun ina rait sociala, 87% han in account tar instagram. En il center da lur interess stattan sport, gieus digitals, musica, sanadad e chats. Las mattatschas legian dapli ch’ils buobs che prefereschan sport e gieus digitals. Interessanta è la constataziun che var la mesadad legia er ina gasetta, plitost ina gasetta gratuita. La televisiun perda la muntada per els. Mo pli 20% fan anc diever da facebook, avant quatter onns eran quai 80%. Era pli baud il smartphon ch’ha midà la moda e maniera da communitgar han actualmain la musica ed il videostriming ina gronda muntada. En il trend sajan er dapli activitads ensemen cun la famiglia e damain partys, ha constatà Daniel Süss, co-manader dal project James.

Problems cun internet

La communicaziun sur internet ha avert in nov mund. Sa chapescha ch’ils giuvenils fan diever da las pussaivladads multifaras da communitgar e da s’infurmar L’internet na pon ins betg scumandar, ins sto dentant emprender dad utilisar quest nov med da communicaziun senza cunfins. Sco problems han ils giuvenils numnà cybermobbing, mulestas sexualas (cybergrooming) e violenza. 30% han retschet da persunas estras communicaziuns cun intenziuns sexualas nungiavischadas che vegnan tituladas sco cybergrooming. Tar persunas da 18/19 onns munta la cumpart schizunt a 43%. Ma gia uffants da 12/13 onns èn confruntads cun talas mulestas. In considerabel augment han constatà ils experts tar il grooming. Quella mulesta che pertutgava l’onn 2014 var 19% è s’augmentada sin 43%. Quasi in quart dals giuvenils han ditg ch’els sajan gia vegnids confruntads cun grevas situaziuns da smanatscha, ins haja vulì far flucs cun els. Michael In Albon, l’incumbensà da Swisscom per dumondas da la protecziun da giuvenils, ha fatg attent che gia uffants da 12 onns èn pertutgads da talas smanatschas.

Bunamain la mesadad dals giuvenils han guardà films pornografics sin il handy u sin il computer. Sin quest sectur datti remartgablas differenzas tranter giuvens e giuvnas. Las giuvnas demussan damain interess persuenter. Cun l’emprima relaziuns d’amicizia sesminuescha l’interess. La pli gronda part dals giuvenils sa futra d’indicaziuns davart la vegliadetgna d’access.

JAMES = Jugend – Aktivitäten – Medien – Erhebung – Schweiz.

Dapli infurmaziuns pon ins retrair sut: