Gronds donns en ils guauds grischuns

Ils stemprads «Burglind» e «Vaia» han chaschunà en il Grischun ils pli gronds donns en ils guauds dapi 24 onns. Quai scriva la regenza grischuna. Ils donns na cuntanschan dentant per bler betg las dimensiuns da l’orcan «Vivian» dal favrer 1990. En total ha il Grischun nudà quest onn 130 000 meters cubic laina donnegiada. Cunzunt haja dà donns en la Val d’Alvra, l’Engiadin’Ota ed en la Val Puschlav. L’orcan «Vivian» aveva chaschunà donns da radund 670 000 meters cubic.

Il suveran da San Murezzan ha acceptà la revisiun parziala da la planisaziun locala cun 806 encunter 304 vuschs. Cun il gea da San Murezzan ha il project Pista Lej dals Chöds fatg in emprim pass envers realisaziun. Sco proxim sto era Silvaplauna approvar la revisiun da la planisaziun locala. La Corvatsch SA prevesa da fabritgar indrizs d’ennavar la pista davent da la sutgera Giand’alva enfin a San Murezzan Bagn cun ina interrupziun da radund 100 meters per lung dal Lej dals Chöds pervia d’ina palì protegida.