Impatriaziun festiva a Domat

Il cumin burgheis da Domat ha puspei saviu beneventar ina retscha da novas burgheisas e novs burgheis alla fiasta d’impatriaziun. L’impatriaziun s’auda tiels impurtonts pensums d’ina vischnaunca burgheisa ed il cumin burgheis da Domat cumbinescha mintgamai la surdada dil dretg da burgheis cun ina pinta e digna festivitad. La surdada dil document da burgheis stat alla fin d’ina integraziun reussida. Uonn ha il president dil cumin burgheis Theo Haas saviu gratular a 31 persunas da differentas tiaras, da maneivel e dil lontan, per igl acquist dil dretg da burgheis.

In impurtont pensum 
dalla vischnaunca burgheisa

Theo Haas ha puntuau ch’ei seigi in impurtont pensum dalla vischnaunca burgheisa da garantir ad interessents l’integraziun cumpleina en nossa societad cun conceder ad els il dretg da burgheis intermediond ad els aschia «in toc nova patria». Las aspirantas ed ils aspirants stoppien denton era sezs esser promts da contribuir lur atgna prestaziun per l’integraziun. Ei seigi perquei impurtont ch’els sefamiliariseschien cun las relaziuns socialas, culturalas e politicas sco era cun la mentalitad da viver en nossa tiara e ch’els discuorien la finala ina da nossas quater linguas naziunalas. Il cumin burgheis da Domat astgi en quei grau bein pretender d’haver promoviu decennis alla liunga ina «politica d’integraziun «fetg aviarta e constructiva», aschia il president dils burgheis.

In tec statistica

Ils 31 impatriai da niev derivan dallas sequentas tiaras d’origin: Italia 8, Germania 4, Portugal 4, Bosnia/Herzegovina 3, Mazedonia 3, Kosovo 2, Engheltiara (1) ed il Grischun cun sis persunas.

Dils 8080 habitonts da Domat eran tenor la statistica 1786 burgheis, 443 persunas dall’ulteriura Svizra e 1861 digl exteriur. Mo en parentesa l’appartenenza allas religiuns. Dils 8080 habitonts ein 4397 persunas da confessiun roman-catolica, 1571 ein reformai e 2109 figureschan sut ulteriuras religiuns.

Adina dapli aspirants per acquistar il dretg da burgheis derivan dils ulteriurs cantuns dalla Svizra ni ord il Grischun. Els vulan sigillar lur liunga dimora el vitg da Domat cun il certificat da burgheis dalla vischnaunca da Domat. Il president dils burgheis Theo Haas ha accentuau en sia allocuziun che l’elecziun cunscienta da Domat sco liug da burgheis documenteschi la liunga attaschadadad al vitg denter las tumas. «Cun tscharner sapientivamein Domat sco Vies liug da burgheis accentueis Vus expressivamein che Vus essas colligiai emoziunalmein cun nossa vischnaunca e perquei che Domat fuorma il center da Vossa veta». Quei ha valiu uonn per exempel era per il menader dalla scola primara Jürg Carisch e sia consorta Jolanda ch’han medemamein retschiert dacuort il dretg da burgheis e ch’ein vegni retscharts uonn specialmein el ravugl dalla vischnaunca burgheisa.

Ins vischnaunca burgheisa 
fetg activa

La vischnaunca burgheisa da Domat dumbra denter las vischaunncas burgheissas las pli activas da nies cantun. Ella metta a disposiziun, grazia alla cumpart dallas entradas dils tscheins dils dretgs da baghegiar, onn per onn summas considerablas en favur d’arranschaments socials, culturals e sportivs dil vitg.

Igl onn current han ins saviu sustener cunzun il project d’in center administrativ «Sil Plaz» che serva all’entira regiun dil Plaun ch’ei gia vegnius inauguraus.

Igl act festiv ch’ei sesplegaus ella Sentupada ei vegnius enrihius entras la band «Gilosty» dalla Scola da musica Domat/Favugn sut la direcziun da Sep Sgier.

Claudio Willi/mc