In’exposiziun extraordinaria ella 
claustra benedictina da Mustér

Dapi igl 1. da settember ei la pusseivladad da contemplar las ovras dil pictur artist Patrick Devonas ch’ein exponidas ella entrada principala dalla claustra da Mustér. Gia tier l’emprema egliada dat en egl ch’ei setracta cheu da maletgs da qualitad extraordinaria. Quels maletgs regordan il contemplader als maletgs dils gronds picturs dil 17avel tschentaner ch’ins sa contemplar en las renomadas gallarias dallas metropolas europeicas. Il dessignader da quels maletgs ei sco gia menziunau Patrick Devonas. Devonas ei naschius e carschius si a Lucerna e frequentau leu la scola.

Gia en ses giuvens onns ha el mussau grond interess per la pictura e sculptura. Cun mo 14 onns malegia il giuvenil siu emprem maletg en ieli. Era en quels onns s’interessescha Devonas per la pictura dils gronds artists dalla pictura dil 17avel tschentaner e siemia da saver contonscher in di quella grondiusa tecnica da malegiar. Quei siemi duei denton buca restar mo in siemi, na, quei siemi duei daventar pli tard realitad. Suenter la scola d’art applicau e da plirs onns da lavur autodidactica seretila Devonas ell’America nua ch’el sa frequentar l’universitad. Suenter haver terminau la scolaziun universitara va siu siemi da giuvenet finalmein en vigur.

Tier il professer Richard Lack a Mineapolis (Minnesota) anfla el la persuna che meina il giuven student ed artist ella tecnica dalla pictura veneziana e dalla flandra. La tecnica dall’academia franzosa survegn el da Steven Levin ch’era sez staus in scolar da Lack. Suenter il studi a Minnesota survegn Devonas in stipendi dall’academia NY a Manhattan nua ch’el contonscha siu «Master Degree». Plirs onns suenter quei diplom malegia el independent e ses maletgs vegnan exponi en diversas gallarias dall’America.

Duront quei temps vegn Devonas era incaricaus d’instruir en differentas universitads e scolas d’art. Suenter treis onns plazza da professura seretila igl artist pictur cun talents extraordinaris dalla gronda metropola en siu vitg natal a Surava nua ch’el viva e lavura sco pictur artist.

La sonda, ils 3 da november ein las detgas tier ils maletgs da Devonas che stattan sut il motto «Sagen und Legenden aus der Region Disentis» vegnidas purtadas dad Antoinette Quinter da Mustér e dad Andrin Schütz, oriunds d’Arosa. Schütz ha studegiau all’Universitad da Turitg historia d’art, teologia e filosofia.

Sco curatur lavura el stretg ensemen cun igl artist Devons. Quinter frequenta adina puspei cuors da praulas e detgas ed ha gia purtau beinenquala tier differentas occasiuns. Che Quinter haveva gronda affecziun ed in bien dun per il teater han ins gia saviu constatar en siu temps da giuventetgna. Duront quei temps giugava ella cun ardiment e cun entuiassem sin la tribuna da teater a Mustér.

Cun il medem entuiassem e cun il medem ardiment eis ella s’engaschada tier quella producziun. Sia mimica e ses gèsts han fascinau ils presents.

L’exposiziun dils maletgs cuoza aunc entochen la fin da november. A mintgin e mintgina che s’interessescha per art dad ault nivel sai jeu mo recumandar quell’exposiziun.

Robert Casanova