La BCG sustegna l’uniun Movimento a Samedan

(cp) Per l’indeschavla giada ha la Banca Chantunala Grischuna (BCG) realisà sia acziun d’advent a favur d’in’organisaziun d’utilitad publica. Las collavuraturas ed ils collavuraturs da la BCG han decis da dar a l’uniun Movimento a Samedan 10 000 francs or dal fond da contribuziun. Regula Ruch, presidenta da l’uniun Movimento, ha grond plaschair da la donaziun da la BCG: «En num da l’uniun Movimento e da tut las persunas cun impediments engraziel jau cordialmain a tut las collavuraturas ed a tut ils collavuraturs da la BCG.» Dapi il 1987 sustegna Movimento en il Grischun umans cun impediments e lur confamigliars che tgiran els. L’uniun gida las persunas pertutgadas a s’integrar en la professiun ed en la societad cun porscher cuminanzas d’abitar, plazzas da lavur e d’occupaziun, tgira, accumpagnament sco er assistenza cumplaina u parziala.

L’uniun consista dals quatter manaschis Ufficina Samedan, Incontro Poschiavo, Buttega Scuol e Buttega Jaura Müstair. «Per nus èn tut las donaziuns enorm impurtantas. Era sche nossas purschidas vegnan finanziadas dal maun public restan averts blers pitschens e gronds giavischs. Grazia a las donaziuns pudain nus ademplir quels», di Ruch. Cun ses fond da contribuziun s’engascha la BCG per la regiun e surpiglia responsabladad sociala. Ella promova e sustegna cun var dus milliuns francs ad onn projects nuncommerzials en e per il Grischun, e quai en ils secturs cultura, utilitad publica, sport, economia/turissem e societad. L’onn 2018 ha ella sustegnì var 430 projects.