La Sassa – dus recurs cunter il resort

La firma d’architectura ed immobiglias Domenig da Cuira ha inoltrà la dumonda da construcziun per la realisaziun dal resort «La Sassa». Tar la vischnanca Val Müstair èn entrads dus recurs, quel dad ina persuna privata e lura era da la gruppaziun da l’ambient WWF, Pro Natura, fundaziun svizra per la protecziun e la tgira da la cuntrada e da World Wilderness. Medemamain èn er ils responsabels dals Implants da sport SA Müstair vidlonder dad inoltrar la procedura d’approvaziun tar l’Uffizi federal da traffic. Quella dumonda vegn inoltrada durant il mais november. Las organisaziuns per la natira sa dostan cunter omadus projects. La manadra da la fatschenta Pro Natura deplorescha il surdiever da la cuntrada per realisar in tal resort e metta er en dumonda sche quai fa senn da fabritgar or ina regiun da skis en in temp cura che las temperaturas s’auzan dad onn ad onn causa la midada dal clima. Tar il project «La Sassa» èsi previs da realisar in resort da 212 letgs en vischinanza da Tschierv che vegn a custar radund 30 milliuns francs. Sper quai èsi previs da realisar ina pendiculara da la val enfin tar la regiun da skis Minschuns e l’ennavaziun da la pista fin a val.