L’ouvra Ova Spin darcheu our d’funcziun

(anr/fa) Daspö ch’üna lavina vaiva terrà sü dal Pass dal Fuorn üna pütta d’ota tensiun d’eira in funcziun üna pütta d’emergenza. Per pudair rimplazzar quella cun üna pütta definitiva vain interruotta ad Ova Spin la producziun. «A la fin da schner, davo las naiveras in Engiadina Bassa, vaiva üna gronda lavina suot la via dal Pass dal Fuorn terrà e demoli üna pütta d’ota tensiun da bundant 40 meters otezza», declera Jachen Gaudenz, manader dal sectur gestiun e mantegnimaint e commember da la direcziun da las Ouvras Electricas d’Engiadina SA (OEE), «uschea d’eira interruotta la lingia d’ota tensiun chi’d es proprietà da la Swissgrid e fin cha quella ha gnü installà üna pütta d’emergenza vaina stuvü tour our d’funcziun nossa ouvra electrica Ova Spin.» Grazcha a quista pütta ha quell’ouvra pudü daspö la fin da favrer darcheu prodüer energia. Pels prossems quindesch dis stan las turbinas dad Ova Spin darcheu salda. In quists dis vain la pütta d’emergenza darcheu allontanada ed i vain installada üna pütta sco avant.

I’l medem lö sco avant 
la terrada

«Avant duos eivnas han ils lavuraints incumbenzats da la Swissgrid cumanzà a prestar tuot las lavuors chi d’eira pussibel sainza tour our d’funcziun la lingia», cuntinuescha Gaudenz. Uossa suna però sü culla nouva pütta uschè ot chi’s sto interrumper quista lingia: «Uschea pona tour ils fils nan da la pütta d’emergenza e tils plazzar al dret lö vi dals isolatuors.» Quai fana cun agüd d’ün elicopter. Als 23 november esa lura previs da metter las lingias darcheu suot tensiun, «uschè chi’s po avair darcheu gestiun normala cun Ova Spin». Sco cha’l perit disch es la nouva pütta gnüda missa in pè precis i’l lö ingio chi d’eira la pütta chi’d es gnüda terrada. Quai es statta la decisiun dals proprietaris: «I’s pudess qua natüralmaing avair eir otras ideas ed esser da l’avis chi dess per quista pütta eir lös chi füssan forsa plü adattats», manzuna Gaudenz, «quai pretendess però ün’investiziun bler plü gronda. Perquai han ils proprietaris da la lingia, la Swissgrid, decis da metter in pè la pütta precis i’l listess lö.»

Dudesch püttas d’emergenza 
in Svizra

Parallelmaing vain demontada la pütta d’emergenza e svolada davent. Quella es 57 meters ota ed ha ün pais da 25 tonnas. «Per svolar quels singuls elemaints fich pesants douvra ün elicopter plü ferm chi riva da dozar fin 2500 kils.» Sco cha Gaudenz disch han ils proprietaris da lingias d’ota tensiun, p. ex. la Swissgrid, üna dunzaina da quistas püttas d’emergenza scumpartidas in tuot la Svizra. La pütta chi’d es amo sül Pass dal Fuorn es proprietà da la Repower. «Ella vain demontada, ils singuls elemaints vegnan manats inavo in ün dals depots», explichescha’l, «schi vain dovrada darcheu inclur in Svizra üna da quistas püttas d’emergenza sta lura eir quella darcheu a disposiziun.»