Tut niev entuorn il lag

dad augustin beeli / anr

Avon in onn ha la suprastonza communala da Laax presentau alla populaziun treis projects «pigns» el contuorn dil Lag Grond. Quels ein prest fini, l’inauguraziun ei previda pigl 1. da december 2018. L’aura actuala ei fetg d’engrau als mistergners ch’ein occupai fetg cullas ventschidas. Avon in onn haveva la populaziun da Laax retschiert en casa in messadi da treis projects che la suprastonza communala haveva preparau. Da sia preschientscha e digl aspect natiral ei il Lag Grond in’attracziun da Laax. Pign e grond, cun tgauns e carrotschas da pops, frequentan fetg quella zona idillica. Suenter biars onns menaschi da stad e d’unviern cun bogn, skis e patinadi ha quella denton giu da basegns d’ina remedura, respectiv ina reorganisaziun cumpleta. Il december 2017 ha la radunonza communala dau il consentiment da realisar gest treis projects enina. «Il Lag Grond dueigi daventar ina marca per guder, semover e serecrear», ha la suprastonza motivau en siu messadi. Finamira eis ei stau da formar diltut niev il contuorn dil Lag Grond. El concept general han ins era integrau dus baghetgs novs. La suprastonza communala ha inclus el concept l’idea d’ina casa da cultura davon e quella d’in’ustria davos il Lag Grond.

Niev liug d’inspiraziun

Gest quater plazzals da baghegiar ha ei dau la stad ed igl atun 2018 entuorn il Lag Grond. La halla da parcar, la casa da cultura, l’ustria ed il contuorn niev han «disturbau» dapi la primavera vargada il «solemn ruaus» entuorn il lag da Laax. Quels plazzals han profitau dalla bun’aura e treis s’avonzan ella fasa finala. Sill’entschatta dalla stagiun d’unviern vegnan els inaugurai e surdai alla populaziun. Sonda, igl 1. da december 2018 vegn la «Cularta» aviarta, il medem gi era l’ustria «Lags». Per quels dus objects ha la vischnaunca da Laax investau bunamein treis milliuns francs. «Cularta» senumna la nova casa per ateliers ed exposiziuns digl art visual. En quei liug sesanflava in clavaziel ch’ins havess stuiu spazzar. La suprastonza communala ha viu ch’in baghetg niev pil scop avisau savess interessar generalmein. Il december 2017 ha la radunonza communala approbau cun gronda maioritad ils projects dils architects Conrad Pally e Patric Rothmund.

El decuors dalla primavera han ins encuretg in num per la nova casa da cultura en construcziun. Ina cumissiun ha eligiu la proposta «Cularta», igl ei ina cumbinaziun feminina dils plaids cultura ed art. Sco quei ch’il president communal Franz Gschwend ha confirmau all’anr han ins surdau il menaschi dalla «Cularta» all’artista e scolasta Yvonne Gienal da Glion. Quella vegn ad organisar e realisar in program cuntinuau cun exposiziuns, cuors ed ateliers. Quei object niev vegn a seprofilar sco liug d’inspiraziun, d’ideas e da promoziun da diversas fuormas digl art. Igl emprem program ei gia semtgaus.

La pli liunga ballabeina dil Grischun

«La formaziun dil contuorn dil lag, l’ustria e la casa da cultura ein investiziuns el futur dalla vischnaunca. Ellas promovan il turissem migeivel, plidentan in vast publicum», han las autoritads da Laax rendiu attent. Al biro d’inschignier da cuntrada Wegmüller da Claustra ha la vischnaunca surdau l’incumbensa da formar da niev il contuorn dil Lag Grond. Denter auter han ins stuiu pinar badugns, salischs, ogna ed era remplazzar zacons fraissens. Novs bauns, cazzolas, ina senda nova, fueinas sco era cundrezs ed implonts da giugs e termagls han s’udiu tiel concept. Als affons vegn ina pintga attracziun a plascher specialmein: Denter auter han ins installau el parc denter hotel Riva e lag ina dallas pli liungas ballabeinas dil Grischun. Quella formaziun nova dil contuorn laian ils da Laax custar la summa dad 880 000 francs.

La finala dat in’ulteriura attracziun en egl. La glieud che va a spass entuorn il lag vegn ad admirar in object architectonic dil biro da Conrad Pally e Patric Rothmund. Amiez il vast pastget han ins tschentau l’ustria nova. Quella sedistingua culla fuorma rodunda e platta, cun finiastras e tablegiai da lenn. Sco quei che la suprastonza haveva presentau il december 2017 s’integrescha igl object optimalmein ella cuntrada. El dat en egl, e tuttina pari ch’el fuvi adina sin quei prau. Per quei niev local gastronomic han ins eligiu il num «ustria Lags», la scripziun oriunda romontscha da Laax. Sper l’ustria han ins baghegiau da niev la plazza da sport. Quei implont survescha igl unviern sco plazza da glatsch e la stad sco plazza da beachvolley.