Undrau la construcziun dil campadi

(anr/ac) Il stabiliment dil Campadi Ogna a Trun ei vegnius undraus cun ina distincziun surdada dall’uniun tetgala dall’interessenza all’elavuraziun da lenn el cantun Grischun. A caschun dall’exposiziun Fiutscher a Cuera ha la collecziun da mobilias da Roman Zangger da Samedan retschiert il secund premi sper l’arena da ballapei a Crap Gries Schluein. Buca meins che 54 projects grischuns ein vegni inoltrai per il Premi Lignum, ina distincziun surdada per prestaziuns svizras en lenn. Ord quella vasta paletta da projects ha l’organisaziun tetgala dalla branscha da lenn el cantun Grischun (Holzbau Graubünden) fatg ina schelta specifica grischuna. Ina giuria independenta ha fatg la tscharna e surdau la gievgia passada a caschun dall’exposiziun dalla formaziun professiunala a Cuera las distincziuns. Cun igl emprem premi ha la giuria undrau il stabiliment dil Campadi Ogna a Trun. In stabiliment erigius en incumbensa dalla Campadi Trun SA e planisaus digl architect Iso Huonder. La giuria ha ludau igl edifeci turistic en lenn, impurtonts per in cantun turistic sco il Grischun. E scret ch’il stabiliment fetschi aschia reclama per la construcziun en lenn. Ton la construcziun purtadra seigi elavurada en lenn massiv buca cullaus, in mussament per ina solida lavur manuala. Ludau ha la giuria medemamein igl interiur e las mobilias elavuradas consequent cun la materia regenerabla indigena.

Dessegn modern elavuraus 
a moda tradiziunala

Il secund premi ha la giuria surdau alla collecziun da mobilias da Roman Zangger da Samedan. Ella ha ludau la filosofia da Zangger da cumbinar lavur tradiziunala e moderna e da nezegiar aunc meglier il lenn schiember. La nova collecziun elavurada en fuormas semplas e claras tarlischi en colur nunusitada. Enten tuccar la mobilia selaschi la structura dil lenn sentir. Il lenn massiv da schiember semuossi agl ur ed egl intern e mantegni l’odur caracteristica. Il creader dallas mobilias demuossi dabia inschign creativ ed innovativ cumbinau cun dabia pissiun. E lu fuss aunc la Arena da ballapei Crap Gries a Schluein che la giuria ha undrau cun la tiarza distincziun. Ella scriva che quella arena da ballapei, planisada dils dus architects Jan Berni e Georg Krähenbühl, seigi l’impressiunonta representanta dad ina regiun habla da realisar in project grazia a bia engaschi, identificaziun, dabia entusiassem, estetica en cumbinaziun cun activitads sportivas. Denter auter scriva la giuria che la construcziun en lenn e crap indigen cumbinada cun inschign dil mistregn indigen e dabia lavur cumina seigi sesviluppada ad in’ovra communala cun clara identificaziun grischuna.

Duas ulteriuras 
renconuschientschas

Dus ulteriurs projects ha la guria undrau cun ina renconuschientscha. Ei secracta dil center dil Project uaul da muntogna ed albiert da giuventetgna «Mesaglina» a Trin. Als architects Gujan & Pally attribuescha la giuria d’haver nezegiau cumpleinamein las pusseivladads constructivas e creativas che sedettien neu dil lenn. Biebein 350 meters cubic lenna digl uaul da Trin seigien flessegiai en quei project. Per digna da vegnir menziunada ha la giuria era valetau la passarella «Sotassa» erigida en incumbensa dalla vischnaunca da Poschiavo. La passarella da 18 meters lunghezia planisada dad Urban Beti ha la giuria valetau sco filigrana e sempla. In’exposiziun ambulonta tras il cantun Grischun cumbinada cun ils objects dil Premi Lignum muossan buca sulet ils projects undrai, mobein tuts inoltrai.