Da funs da Mattiu Defuns

Cun Mattiu Defuns ha 
Andreas Cadonau / ANR discurriu

Annunziaus era il niev album gia dapi in cert temps e la sonda vargada ha il giuven cantautur da Trun, Mattiu Defuns, teniu enta maun il niev disc cumpact che senumna «Da funs». Per gest battegiar sia novissima ovra che cuntegn 16 atgnas canzuns a caschun dad in concert a Cuera. In proxim concert suonda vendergis, ils 23 da november a Trun.


Tiu niev album «Da funs» ei cumparius, finalmein, sco ti has indicau ella reit. Selai in tal project insumma planisar sin in termin exact?

Mattiu Defuns: Ei dat segir musicistas e musicists che lavuran tenor in clar plan da termins e tilan atras quei. Tier mei ei tut succediu in pass suenter l’auter e singuls pass han duvrau dapli temps. E lu eis ei da luvrar cun auters artists responsabels per grafica, videos, registraziun e buca tut ei adina organisau aschi surprendent.

Ti has era scret 16 agens tocs rimnai sin quei album, quella lavur creativa san ins probabel era buca scurlar ord la mongia?

Las canzuns eran gia avon maun enaquella ch’jeu sun sedecidius da registrar igl album. Certinas ein gia enconuschentas e per exempel emessas via radio.

Nua ei la lavur sedifferenziada viers igl album communabel d’avon dus onns?

Ina pulita differenza, avon dus onns s’entupavan Ivo Orlik ed jeu per scriver las canzuns da cuminonza. Scriver canzuns aschidadir sin commando exact quei gi ei buc aschi sempel. Ussa sun jeu staus pli libers da scriver sco igl ei sedau. Avon dus onns vein nus registrau cun l’atgna band. Quella ga sun jeu serendius a Berna en in studio cun musicists professiunals. Jeu enconuschevel buc els ed els era buca mei, aschia che quei ei stau ina situaziun speciala. Els han bein retschiert las canzuns ordavon.

Ei ha duvrau in cert temps per s’endisar?

Els ein bein musicists da professiun, tuttina han ei duvrau temps per emprender d’enconuscher mei ed endriescher tgei ch’jeu vi insumma.

Ti eis sededicaus a divers stils musicals, ei Mattiu Defuns era alla tscherca da siu agen stil?

Jeu creigiel schon dad esser empau ella fasa d’encurir. Jeu sai denton tgei che plai a mi ed igl ei buc aschia ch’jeu emprovel semplamein enzatgei. Jeu teidlel era musica classica ni da chors sper rock, pop e reggae ed experimenteschel bugen. Il fil tgietschen ein denton segir las cumposiziuns e mia vusch cun la band.

In svilup ei giavischaus?

Gie, jeu sun dil meini da stuer empruar ina ni l’autra caussa per insumma saver sesviluppar.

Valeteschas ti musica e text da tias canzuns per egualas?

Jeu sai buca pretender che la melodia fuss pli impurtonta ch’il text da mias canzuns. Quei nescha ensemen. Jeu scrivel buc igl emprem in text e fetschel lu la melodia. Sch’jeu fetschel ina canzun sunel jeu in pèr accords sin la ghitara, ina tonalitad che plai a mi e lu neschan en fuorma da freestyle text e melodia. Aschia vegn cuntinau entochen ch’jeu hai il sentiment ch’ei seigi duvrabel.

La decisiun finala tgei canzun ch’anfla la via ella publicitad schai en tes mauns?

Quei decidel jeu mez, jeu hai bia caussas avon maun, forsa pli persunalas, via la musica purtass quei ella publicitad autruisa pli probabel buc.

E lu il lungatg romontsch, impurtont?

Gie segir, en miu lungatg-mumma sai jeu scriver e s’exprimer meglier.

Musica ei gie globala, il lungatg fuorma tuttina in cert cunfin?

La musica ei universala ed en cumbinaziun cul text senta era bia glieud che capescha buc il text las emoziuns dalla canzun e quei dat a mi in bien sentiment. E lu ei aunc la translaziun dil text avon maun ella cuviarta dil dc.

Ed uss ei segir il punct arrivaus dad esser leds da puder presentar igl album?

Quei ei aschia, la preparaziun ei biala e tuttina stufia. Cunzun sch’ins fa quei sper la lavur. Uss ei cheu ina certa tensiun co la glieud reagescha, cons che vegnan a concert. Jeu sai che biars spetgan essend ch’jeu hai gia dagitg annunziau igl album.

E tes plans futurs, viver dalla musica in siemi?

Gie, en sesez schon, viver dalla musica fuss schon in siemi, denton buca 
sempel, sco Romontsch. Momentan sundel jeu dependents da sponsurs 
ed impundel era agens mieds en in tal project.