Franar ils custs per la 
sanadad e fundà Curvita

(cp) La Gruppaziun 60+ dal Grischun ha salvà dacurt ina dieta en l’Hotel Chur a Cuira. Temas: Franar ils custs sin il sectur da sanadad e la fundaziun da la nova uniun chantunala Curvita per tals che tgiran confamigliars. Suenter la beneventaziun tras il president da la gruppaziun, Roland Tremp, ha cuss. naz. Martin Candinas referì l’emprim davart la lantschada da l’iniziativa federala «Per pli bassas premias – franar custs sin il sectur da sanadad».

Igl è temp dad interprender insatge encunter ils custs creschents per il sectur da sanadad e dad interrumper il respectiv svilup negativ. Quels custs sajan creschids dapi l’introducziun da la nova lescha da malsauns da l’onn 1996 fin 2016 per 2,5 giadas tant ed hajan cuntanschì dapreschent 86 milliardas francs ad onn. Durant la medema perioda sajan las pajas s’augmentadas en noss pajais en la media be per 25%. Questa discrepanza enorma chaschunia ina grevezza nunacceptabla per blers pajaders da premias. Cun suttascriver l’iniziativa instradada possian ins cuntanscher in levgiament per blers che pajan premias.

En la segunda part da la dieta ha la presidenta Iris Hess-Lanfranchi preschentà la nova uniun Curvita, fundada per noss chantun. Ils basegns per tgira vegnian a crescher permanentamain en noss pajais en consequenza dal fatg che la populaziun vegnia adina pli veglia. Perquai saja i necessari en la societad ch’era confamigliars sa gidian voluntariamain cun lur contribuziun na renunziabla. I dettia gia oz en noss chantun enturn 6000 confamigliars da tuttas vegliadetgnas che sa gidian voluntariamain tar tgirar confamigliars. Questa prestaziun vegn stimada sin ca. 85 milliuns francs ad onn.

Per sclerir e sustegnair lur basegns è l’uniun Curvita vegnida fundada il davos onn. Quella s’engascha cun ina incarica dal chantun per represchentar e realisar ils interess dals confamigliars che tgiran. Ella intermediescha era cussegliaziun professiunala e dat sustegn cumpetent.