20 milliuns per Cassons-Sardona

(anr/abc) La vischnaunca da Flem sto arver da niev il territori da Cassons e Sardona pil turissem. Quei ei necessari suenter che l’Arena Alva SA ha stuiu spazzar il vegl implont da Naraus-Cassons construius igl onn 1956. Ussa seporschi alla vischnaunca ina schanza unica, scriva la suprastonza communala da Flem en siu messadi tier il preventiv 2019. Ins vegli arver l’Arena tectonica Sardona, il monument dalla natira che fa part dil patrimoni mundial dall’Unesco, cun in project en pliras etappas. Igl ei previu da realisar in emprem project parzial igl onn 2021 cun investiziuns da 10 milliuns, in secund igl onn 2022 cun in milliun ed il tierz igl onn 2023 cun nov milliuns francs. Alla radunonza da preventiv dils 10 da december 2018 vegn la gruppa Arena Alva a presentar il niev plan ch’ei previus per quei intent. Flem sto era investar el center da sport Prau la Selva. La concessiun da far glatsch en quei implont vegl cun immissiuns sur las limitas legalas croda la fin digl onn. Sco quei che la suprastonza communala da Flem communichescha el messadi tier la radunonza dils 10 da december ha il cantun prolungiu la concessiun tochen la primavera 2020. Quei garantescha alla vischnaunca da preparar ina varianta co s’avanzar en gliez project. Igl onn 2019 ha la vischnaunca cunquei da purtar puspei in deficit da 257 800 francs. Il preventiv 2019 dil quen administrativ dalla vischnaunca da Flem preveda in gudogn da 208 300 francs, quei tier expensas da 29 722 700 ed entradas da 29 931 000 francs. Igl onn 2019 quenta la vischnaunca da saver far amortisaziuns ordinarias da 423 000 francs ed extraordinarias dad 1 222 000 francs. Tenor il plan da finanzas vegn la vischnaunca da Flem ad investar tochen e cun igl onn 2023 ina summa totala da 41,8 milliuns francs. Igl onn 2019 ei budgetaus cun investiziuns nettas da 5,145 milliuns francs. Inclus en quella summa ei la cumpra dalla parcella dalla posta a Flem Casa d’Uaul. Las contractivas culla possessura seigien s’avanzadas, scriva la suprastonza communala. Quell’investiziun vegn a custar alla vischnaunca la summa da dus milliuns francs. Quella fatschenta suttametta la suprastonza communala igl onn proxim alla votaziun all’urna.