Varga 400 pacs

(anr/abc) L’jamna vargada ha l’anr rendiu attent all’acziun da rimnar pacs da Nadal dalla Missiun cristiana digl ost. Il temps da rimnar era limitaus tochen sonda, ils 17 da november. Quei termin era fixaus damai ch’il camiun ei vegnius gliendisgis, ils 19 da november per transportar ella centrala a Berna ils pacs rimnai dalla Surselva. Sco quei che Jacqueline Pfister, l’organisatura regiunala, ha confirmau all’anr ei la populaziun sursilvana puspei stada fetg generusa. En tut han las coordinaturas retschiert 401 pacs dalla Surselva. Malgrad il grond plascher che las coordinaturas han giu dil success surprendent dalla rimnada 2018 han ellas era giu in mument meins legreivel ch’ha bunamein muentau las larmas: In dils pacs han ellas stuiu confiscar. Ina persuna haveva viu la rimnada sco caschun beinvegnida da dismetter vivonda snizzada e scadida. Igl ei stau per cletg in singul cass ch’ha buca saviu lavagar l’entira acziun caritativa. Immediat suenter la surdada da mintga pac ha quel retschiert in’etichetta ch’indichescha sch’il pac ei destinaus per affons ni per carschi. Las coordinaturas han il basegns d’engraziar cordialmein e resentidamein a tut tgi ch’ha susteniu l’acziun beinvulentamein. La Missiun cristiana digl ost garantescha in agid effectiv e direct che fa plascherun a numerusas famiglias basignusas ellas tiaras digl ost. Dil diember total da 401 pacs ch’ins ha rimnau en Surselva ha l’Uniun da dunnas da Sagogn contribuiu cun 153 pacs ch’ella ha retschiert dalla populaziun dil vitg.