Visiun d’elavurar products agricols

Radund 50 chatschaders e purs han participà ad in inscunter dal Parc Ela nua ch’igl è vegnì discutà davart in lieu central nua ch’ins pudess elavurar e distribuir products da la regiun. E sco ch’i para exista l’interess per ina tala purschida. Adina puspè è il davos temp vegnì discutà davart l’idea: Il Parc Ela duvrass in lieu adattà nua ch’ins pudess elavurar products da l’agricultura.

I duvrass in magasin ed in’organisaziun che distribuescha ils products dal Parc Ela. Prender encunter empustaziuns, furnir la rauba e far la lavur da contabilitad. A la runda da discussiun dal Parc Ela è vegnì il signal ch’i dovria ina tala purschida. Co ed en tge furma vulan il Parc Ela ed il sviluppader regiunal da la regiun Alvra evaluar il proxim temp – quai, tranter auter, sin basa d’in’enquista ch’è vegnida repartida a purs e chatschaders.

La vischnanca da Tumein ha in nov president communal. Martin Wieland ha fatg la cursa cunter il president en uffizi Oswald Sulser. Insaquants vischins sa fan dentant quitads ch’el pudess avair interess dubels. Sin il plan da lavur da la vischnanca da Tumein stat en il futur il plan da quartier dal territori «Wasserschmitten». Là n’è betg be la gronda orticultura Wieland, mabain là è er planisà ina surbajegiada. Kurt Siegrist, abitant da Tumein, ha menziunà en in fegl sgulant a la populaziun da Tumein anc avant las elecziuns ch’el sa fa quitads ch’il candidat Martin Wieland pudess profitar cun la orticultura da sia rolla sco nov president. Wieland dentant sincerescha che la pli gronda part dal terren correspundent saja vendì ad ina firma d’immobiglias e che sia zona fissia be pauc pertutgada da las midadas ch’il nov plan da quartier prevesa.

Sper l’elecziun dal nov president han ils da Tumein approvà il preventiv da l’auter onn. Tar entradas ed expensas da radund 5,8 milliuns francs serra quel cun in minus da var 80 000 francs. Il pe da taglia resta tar 100% da la taglia chantunala simpla.

La radunanza communala ha plinavant elegì da nov la suprastanza. Andrea Pargätzi e Hans-Peter Clénin èn vegnids reelegids. Da nov en suprastanza èn Peter Färber e Bernhard Spadin.

L’Uffizi federal per aviatica civila ha relaschà in scumond da sgular per ils dus aviuns JU-52 ch’èn staziunads a Dübendorf. L’examinaziun da l’aviun crudà giu ils 4 d’avust al Piz Segnas sur Flem haja mussà donns structurals vi da las alas.

Las examinaziuns vi da l’aviun dal medem tip ch’è crudà giu questa stad a Flem hajan mussà donns structurals vi da las alas. Quai resorta d’in rapport intermediar dal Sust, il post d’examinaziun d’accidents. Tar ils donns sa tractia da sfessas e corrosiun vi da l’asta principala da l’aviun – l’element purtant da l’ala e vi d’ulteriuras parts da l’aviun. Quels donns n’eran betg vegnids chattads durant lavurs da revisiun ed èn pir vegnids scuverts a maun dals tocs restants da l’a-viun.

Ils donns na sajan dentant tenor las enconuschientschas da fin uss betg il motiv per la crudada. Er na dettia actualmain nagins indizis che problems tecnics hajan chaschunà la crudada da l’aviun. Las examinaziuns tecnicas n’èn dentant anc betg terminadas.

Cunquai ch’ils dus aviuns Ju-52 ch’èn staziunads a Dübendorf correspundan tant da la vegliadetgna nà sco er da las uras da sgular a la maschina crudada giu sto uss vegnir cumprovà ch’ils dus aviuns n’han betg quels donns. Fin che quest mussament è fatg u eventuals donns cumadads na dastgan ils dus aviuns betg vegnir sgulads, scriva l’Uffizi federal d’aviatica civila.

La Ju-Air, la possessura da l’aviun crudà giu, accepta la decisiun dal Bazl e lascha examinar ils dus aviuns. L’inquisiziun da l’accident dura probabel anc fin l’atun da l’auter onn.

La Svizra ha exportà l’october rauba en ina valita da 18,9 milliardas francs. Quai èn 6% dapli ch’il settember. Tenor l’Administraziun federala da duana han surtut ils products chemics e farmaceutics contribuì al grond plus.

Tar ils imports cuntinuescha però il trend negativ. L’october ha la Svizra importà rauba per 16,2 milliardas francs, 1,8% damain. La bilantscha da commerzi munta uschia ad in surpli da 2,6 milliardas francs.

En Svizra è la mancanza da persunal qualifitgà sa pegiurada levet quest onn. Tut tenor las gruppas da professiun datti però grondas differenzas. Quai resulta dal monitoring dal martgà da lavur d’Adecco e da l’Universitad da Turitg.

Entant ch’entginas professiuns han memia pauc persunal qualifitgà han autras memia bleras persunas qualifitgadas. Ina mancanza acuta datti en l’entira Svizra tar ils inschigners, tecnica ed informatica. Ed er en il sectur d’administraziun fiduziaria èn persunas qualifitgadas raras. Las interpresas hajan difficultads da chattar avunda e bun persunal per quellas professiuns, ha ditg Nicole Burth, la scheffa dad Adecco Svizra. Era las professiuns da sanadad han memia pauc persunal, e quai gia dapi onns.

Tar professiuns da la gastronomia e da construcziun percunter datti dapli persunas che tschertgan lavur che plazzas libras. Cunquai ch’in grond dumber dals emploiads lavuran en ina branscha cun ina fluctuaziun da persunal pulit auta dat quai ina gronda concurrenza en las professiuns pertutgadas.

Quai pretenda la cumissiun da gestiun dal cussegl dals chantuns. Products medicinals sco charrets da chaminar, maschinas d’inhallaziun u era material per bandaschas custan numnadamain adina dapli a las assicuranzas da malsauns

Perquai ch’ils motivs per l’augment da custs n’èn betg propi visibels dovria quai ina retschertga detagliada. Era pretenda la cumissiun d’introducir in monitoring da custs. Tenor l’Uffizi federal da sanadad publica (BAG) è ina da las raschuns per l’augment da custs er ch’igl è vegnì finanzià products cun quests daners che na fissan betg previs da vegnir finanziads sin questa via.

L’associaziun da las assicuranzas da malsauns Santésuisse ed il survegliader dals pretschs quintan cun pussaivels respargns da 100 milliuns francs, la confederaziun quinta cun respargns da 10 milliuns.

La mazlaria Fischbacher da Tusaun vul construir ina chasa da maz ad Alvaschagn en Val d’Alvra. Quella duai vegnir construida a l’ur da la via chantunala en la zona d’industria. Ils custs muntan a 2,8 milliuns francs, ha ditg Maik Fischbacher, il manader da fatschenta. La finanziaziun saja sin buna via, però betg anc garantida. Ins speria, tranter auter, sin daners da la promoziun da l’economia. Cun las lavurs da construcziun quintan ins da pudair cumenzar en in onn u in onn e mez. Il lieu saja bain adattà cun quai ch’el saja fitg central e blers clients vegnian da la Val d’Alvra. La chasa da maz duai avair ina grondezza da 580 meters quadrat.

Il mument n’ha la mazlaria Fischbacher nagin’atgna chasa da maz. Actualmain porta la mazlaria ils animals a Realta nua ch’ils temps da spetga sajan per part fitg lungs. Magari stoppian ins reservar in termin gia dus mais avant, uschia Fischbacher.