En nov preditgant tgi sa sainta bagnnia

Da Peder Antona Baltermia

Antschet igl sies nov pensum scu preditgant dalla plev refurmada Beiva-Surses ò Markus Schärer (59) all’antschatta november. La dumengia digls 11 da november è stada a Beiva la sia installaziun. El davainta successour da Peter Wydler. Igl sies dialect svizzer mecta lartg tradescha tgi las sias rieischs èn ensanouas aint igl cantun Berna: «Ia sung carschia se agl conturn digl martgea da Berna a Liebefeld/Köniz ed ia sung er sto durant blers onns scu preditgant a Meiringen. Uscheia am è igl mies dialect bernes resto. Rumantsch saia deplorablamaintg betg. E per amprender sarogl en po tard», dei Markus Schärer an ena moda ruassevla tgi è bagn en tant tipica per en Bernes.

Preditgant sen la 
sagonda veia

Igl nov preditgant dalla pleiv refurmada Beiva-Surses ò betg tscharnia directamaintg la veia dalla teologia. Igl amprem ò el fatg en amprendissadi serious mercantil e luvro ples onns scu revisour tar ena societad fiduziara ainten la sia regiun. Ensacuras ò el santia tgi cefras na saptga betg esser igl cuntign dalla sia antiera veta.

Igl sentimaint social ò sa fatg santeir. Uscheia ò el mido ainten ena tot otra sparta professiunala ed ò luvro dus onns scu manader da gruppa ainten ena tgesa d’unfants. Planget è davanto pi ferm igl giaveisch da leir stibgier teologia. Pigliond siva la matura è suando igl studi da teologia a Berna.

Igl sies amprem post scu preditgant è sto a Meiringen noua tgi el pastorava per 50% la pleiv e vetiers er per 50% la tgira pastorala dalla clinica psichiatrica aint igl madem li. Chegl ò Schärer fatg durant 15 onns. Tar igls preditgants refurmos ègl cunsiglia da midar da taimp an taimp li d’activitad. Uscheia è el rivo gliunsch davent dalla sia patria tar la pleiv refurmada a Schlarigna. Lò è el sto igls davos diesch onns.

Sen la dumonda tge tgi vegia mutivo da neir sur igl pass no e da midar plazza relativamaintg curt avant la pensiun manegia el: «Gl’è do en conflict an Nagiadegna cun igl cumegn-baselgia da diversas pleivs. Siva tgi gl’è do ena fusiun ed era tot atgnamaintg sen buna veia ègl alloura do problems cun la realisaziun. Gl’è do ena nova suprastanza e betg tot è nia fatg scu discurria ed ampurmess e chegl ò mano tar conflicts», declera el la situaziun.

Uscheia seia nia scu clamo tgi ins tschartgeva en plevant per Beiva-Surses.

Tot bagn sen veia

Schärer è spartia. El ò dus unfants tgi veivan anc aint igl cantun Berna ed è er gio tat. Ossa è Cornelia Pedretti, la manadra digl museum da Segantini a Son Murezza, sia partenaria.

Igl post da preditgant Beiva-Surses è en pladimaint da 73%. Vetiers vignan anc 20% scu post da cunsegliaziun per pêrs e da veta. Chella sa nomna «Paarlando». Ena instituziun ecumena dallas dus baselgias cantunalas. Da prancepa ègl chegl la cunsegliaziun uffiziala digl cantun per lètgs. Schärer tgira en post extern da chella ed è responsabel per Surses, la Nagiadegna e las vals taliangas.

Ainten chels 73% pladimaint dalla pleiv refurmada Beiva-Surses è cuntigneida la normala pastoraziun inclusivamaintg la dutregna. Lò instruescha el per igl davos onn a Beiva, alloura la 4.–6. classa primara a Savognin. Pinavant igl antier scalem superiour an furma da projects ansemen cun Zegna Pittet ed Adam Pradela.

«Per me stat cleramaintg la pastoraziun agl center ed ia less reglar tant scu pussebel an discurs cun la gliout», dei Schärer.

El ò er en’opiniun clera chegl tgi pertotga l’ecumena e manegia tgi chella vegia aint igl taimp dad oz ena fitg gronda muntada. Per el seia betg imaginabel da leir cunterfar cò ad ensatge. El vegia pero l’impressiun tgi cò an Surses seia igl mument ena fitg buna collaboraziun. Seia chegl cun las persungas angaschedas ainten la pastoraziun scu er cun igls responsabels digls dus cumegns-baselgia.

Blers sen veia

Cun 59 onns vo igl taimp anfignen tar la pensiun betg ple schi dei. Da chegl seia pero igl cumegn-baselgia consciaint.

Sen la dumonda tge tgi igl nov preditgant fetscha, schi el seia betg gist an uffezi, manegia Schärer tgi el sa legra dad eir a Beiva cun skis. Anfignen ossa era el egn da chels tgi passavan angal Beiva. Ossa seia el vedlonder dad amprender a canoscher gliout, pievel e conturn. Dalla sia sitaziun annò seia el er savens sen veia. Seia chegl giu Berna tar igls sies unfants e beadis u seia chegl cun la rulotta. Chella seia staziunada a Chiavenna agl camp lò sot las cascadas. Er sia partenaria vegia unfants ed uscheia ins seia adegna en po sen viadi tranter ena famiglia e l’otra.

Impurtant seia da sa santeir bagn a tgesa. Els vegian ena gronda e bela tgesa pravenda a Beiva. E chegl duess esser ena tgesa averta per tots. El vegia fitg gugent visita.

Las ampremas impressiuns dalla sia nova dimora e digl sies post da lavour seian fitg positivas. Ins seia sto fitg communicativ ed ins seia oriento da cattar bunas schliaziuns. El sa sainta dad esser bagnnia e less angraztger per la bagnvuglientscha generala tgi el vegia dastgea santeir.