Premi papal per Mario Botta

(cp) Papa Francestg ha surdau per uonn il Premi Ratzinger, numnaus tenor il papa emeritau Benedetg XVI, agl architect svizzer Mario Botta per ses merets d’haver inspirau cristianamein art sacral. Igl architect tessines hagi capiu da crear art sacral els marcaus. Quei ei – tenor papa Francestg – da fetg gronda valeta e dueigi vegnir renconuschiu e promoviu dalla baselgia. Ei existi oz in grond prighel dad emblidar la dimensiun spirituala e da dehumanisar spazis urbans.

Architect Mario Botta ei vegnius distinguius pervia dalla dimensiun teologica da sia estetica. Quei ha il cardinal Gianfranco Ravasi detg tier la laudatio. Il premi ei dotaus cun 50 000 euros.

En sia allocuziun veva papa Francestg constatau che siu antecessur e fundatur dil Premi Ratzinger, papa Benedetg XVI, seigi sefatschentaus culs problems da nies temps en in spért da cunscienziusadad curaschusa. Per il dialog constructiv cun la cultura dad oz seigi ina sabientscha necessaria che sebasi ton silla bibla sco silla tradiziun viva dalla baselgia. Perquei seigi ei era da grond gudogn da sefatschentar cun las numerusas publicaziuns dil papa emeritau Benedetg XVI.