Rutina e calma sin 
la muntogna

Per il mument èn ils organisaturs da la Cuppa mundiala da skis a San Murezzan anc optimistics en vista a la pauca naiv. Sch’i na vegn betg a naiver giu da tschiel sche duai la naiv artifiziala gidar. Dentant avessan ins nagut encunter sch’era la cuntrada fiss alva fin là. Be anc duas emnas e mez e lura han lieu a San Murezzan las cursas da la Cuppa mundiala da skis. L’enviern n’è dentant anc betg propi arrivà. Tar ils organisaturs na datti però nagin motiv per panica. Per l’ina constatan las temperaturas dapi l’emna passada per far naiv artifiziala e per l’autra han ins avunda aua per producir ella.

Tenor Martin Berthod, il president dal comité d’organisaziun, avessan ins dentant era plaschair da la naiv natirala. Schizunt curt avant las cursas, cura ch’ella faschess probablamain dapli lavur a tut las gidantras ed als gidanters. Ina cuntrada alva saja tenor Berthod adina giavischà tar talas occurrenzas, oravant tut ord puntg da vista turistic.

La Svizra na di per il mument betg GEA a la cunvegna da migraziun da las Naziuns Unidas ONU. Il cussegl federal ha fatg a savair che la Svizra na vegnia betg a prender part il december da la conferenza da l’ONU che vul deliberar la cunvegna. Quai rapporta l’agentura da novitads SDA. Il cussegl federal ha decis da betg prender part da la conferenza da las Naziuns Unidas nua ch’il contract vegn deliberà. El vul spetgar giu la debatta en il parlament avant che decider.

La cunvegna da migraziun duai vegnir deliberada ad in inscunter suprem da l’ONU ils 10 ed 11 da december en il Maroc. Cun la cunvegna vul l’ONU fixar per l’emprima giada la basa per il tractament da migrants.