Augmentan la resca da daventar paupers

(cp) La Caritas svizra ha legiu las levitas ton alla confederaziun sco als cantuns. Premias carschentas per cassas da malsauns seigien per tals cun bassas entradas ina falla da vegnir ella paupradad. Las mesiras da far quellas premias pli bienmarcau vegnan negligidas en biars loghens. Ins pretenda perquei novas reglas. Tenor la Conferenza svizra per agid social vivan entuorn 600 000 carstgauns gest in tec sur la limita da paupradad en Svizra. In prighel che quei vegni aunc mender tras las premias carschentas dallas cassas da malsauns exista. Sche quellas s’augmentien vinavon aschi fetg seigi la limita d’esser paupers gleiti contonschida. Las premias per las cassas da malsauns ein la suletta deducziun fixa che sedrezza buca tenor il budget da famiglia. Premias carschentas augmentien la resca da vegnir paupers. Sche la paga creschi buc vegnien famiglias dependentas digl agid social tras buca saver pagar las premias.

La Caritas insista, alla adressa da confederaziun e cantuns, che la grevezia dils tenerscasa tras pagaments allas cassas da malsauns astgi buca survargar ina paga mensila. Criticada dalla Caritas vegn era la pratica da far pli bienmarcau las premias. Quels daners vegnien savens 
applicai per auters intents che pil sectur social.

La confederaziun ed ils cantuns dueigien perquei fixar reglas per in importo da descargar tenerscasa pertuccai ed era normar la grevezia maximala. Facit: Ils tenerscasa cun bassas entradas dueien pagar meins premias che tals cun aultas. Ina tala differenziaziun cun far pli bienmarcau premias seigi centrala. Quei model disfagessi igl automatissem hodiern che sforza ils tenerscasa da quels giudem el stan miez ella paupradad tras premias carschentas per cassas da malsauns.