Glisch verda per ina nova purschida d’agroturissem en la vischnanca da Sagogn

(cc) La regenza ha approvà la revisiun parziala da la planisaziun locala, concludida da la vischnanca da Sagogn ils 8 da december 2017. La finamira da questa revisiun parziala è la determinaziun d’ina zona per agroturissem en il territori «Bargaus». Uschia vegnan stgaffidas las premissas per construir dus batschigls per ina piscicultura, ina plazza da giugar ed ina plazza da grillar sco er in edifizi da manaschi cun ina pitschna ustaria. A las visitadras ed als visitaders duai vegnir dada la pussaivladad da racoltar sezs verdura da la plantascha existenta u da pigliar peschs e da laschar cuschinar quai en la pitschna ustaria.