Schizunt dus Volgs mantegn Savognin

Era sch’il Volg Grava da Savognin na fa nagin gudogn n’èsi il mument nagin tema da serrar la filiala dasper la baselgia Nossadonna. Grazia ad ina buna svieuta dal Volg Son Mitgel al Stradun èsi pussaivel da mantegnair omaduas filialas a Savognin, ha ditg il manader da fatschenta Conrad Plaz. Tenor Plaz haja il Volg Grava a Savognin avant diesch onns anc fatg ina svieuta da radund in milliun. Quest onn dettia quai ina svieuta da radund 900 000 francs, tge che saja in pau dapli ch’avant in onn. Quella svieuta saja però memia pitschna per far in gudogn. Tuttina vesa quai er or tar il Volg da Salouf. Grazia dentant a la buna svieuta dal Volg Son Mitgel a Savognin marschian ils affars dentant uschè bain il mument ch’ins possia mantegnair tuttas trais filialas che vegnan manadas da la cooperativa Consum Savognin e conturn.

Dals 26–29 da november resta il Volg Grava serrà, i vegn a dar in nov sortiment ed ina nova frestgera.

Venderdi, ils 30 da november è la reavertura.

Alice Kühne da Scuol daventa l’emprima dunna che trenescha l’equipa naziunala da downhill. Cun Kühne surpiglia in’anteriura atleta da la Cuppa mundiala quest post.Tar l’equipa da downhill Svizra è reglada la successiun dal trenader partent Lars Peyer. Alice Kühne da Scuol surprenda sco emprima dunna il post da trenadra. Kühne è creschida si en Engiadina Bassa. Suenter ses studi a Berna ha ella lavurà en differentas clinicas sco terapeuta da sport e psicologa.

Alice Kühne ha 35 onns e porta ina gronda savida en l’equipa da downhill. Er ella sezza è stada curridra da la Cuppa mundiala. Ella ha fatg part dals Campiunadis mundials d’elita ed è dubla campiunessa mundiala en la categoria da masters.