Negina societad da musica pli

(anr/hh) Medel ha negina societad da musica pli. Cun occasiun dalla radunonza generala la fin d’october han commembras e commembers dalla societad decidiu unanimamein da sligiar si quella per immediat. La decisiun ei stada negina surpresa. Muort munconza da commembras e commembers haveva la societad decidiu gia igl onn vargau da sistir pil mument si’activitad. Quella decisiun era vegnida prida cun la gronda speronza ch’ei reusseschi tonaton d’animar novas musicantas e novs musicants d’entrar ella societad ed aschia da garantir si’existenza pil mument. Quei ei enton buca reussiu, sco quei che la societad communichescha el Fegl ufficial dalla Surselva. La primavera 2017 havevan tschun commembers activs decidiu da calar da sunar, aschia che la formaziun dumbrava il davos aunc 15 dels, inclusiv tamburs e bandierel. Per la davosa presidenta dalla societad, Silvana Monn da Sumvitg, era ei gia lu clar ch’ins sappi buca cuntinuar cun in aschi pign diember d’activs.

Liunga tradiziun

La Societad da musica Medel/Lucmagn era vegnida fundada 1894. Sco ins sa leger el cudisch davart la vischnaunca da Medel ha quella fundaziun giu in motiv special, numnadamein da saver sunar alla messa nuviala vegnenta da sur Pius Pally. Sco previu ei la musica lu sepresentada per l’emprema ga alla messa nuviala ils 14 da zercladur 1896. Dapi lu ha la societad embelliu las fiastas tradiziunalas dalla baselgia, da primizias, dalla mistralia sco era inauguraziuns, fiastas persunalas e perdanonzas. Regularmein ha la societad era dau concerts, pil pli la primavera. Ella ei denton era separticipada a fiastas da musica, la davosa ga alla districtuala igl onn 2010 a Trun. La davosa dirigenta ei Iris Monn stada, la sora dalla presidenta Silvana Monn. Ella ha dirigiu la musica duront rodund tschun onns.