Nossaistorgia.ch – ina pagina 
nua ch’ins po restar pendì

(rtr) En l’ultima seduta dal 2018 è il Cussegl dal public da la SRG.R s’occupà cun la pagina «nossaistorgia.ch», ils «Accents», la revista da chasa dad RTR, e l’emissiun naziunala «Gli altri, ils auters, les autres, die Anderen». La plattafurma Nossaistorgia.ch, ch’è vegnida lantschada l’october 2017 dad RTR en collavuraziun cun la fundaziun «Fonsart», è l’emprima plattafurma digitala, istorica e participativa da la Svizra rumantscha e dal Grischun. Sin «nossaistorgia.ch» pon privats ed instituziuns metter online lur fotografias, videos u documents e parter quels cun la communitad. Il cussegl dal public (Cdp) è intgantà da quest’idea. I dovria in zic temp per vegnir a frida cun la navigaziun, ma ina giada ch’ins haja chapì il sistem saja quai fitg interessant da sfegliar en regurdientschas e reminiscenzas. La funcziun da tschertga gidia fitg bain da chattar quai ch’ins tschertgia. Ultra da quai dettia quai era divers filters che simplifitgeschian la lavur. Il Cdp fa in grond cumpliment per l’idea e la realisaziun. Quai saja in project che duess en mintga cas cuntinuar.

Buns resuns per la revista «Accents»

Bun format, bun layout e buns cuntegns. Quai è il facit ch’il Cdp fa suenter avair prendì sut la marella las ultimas ediziuns da la revista che cumpara quatter giadas l’onn. La publicaziun ch’exista dapi il 2010 vegn tramessa a tut las collavuraturas e tut ils collavuraturs dad RTR, a tut las commembras ed ils commembers da la SRG.R ed ad ulteriurs abunents ed abunentas che s’interesseschan per quai che capita tar RTR e la SRG.R. Al Cdp han en spezial las infurmaziuns en connex cun las collavuraturas ed ils collavuraturs dad RTR plaschì ordvart bain. Quai dettia ina colliaziun famigliara tar RTR. Ins emprendia d’enconuscher ils novs en il team dad RTR e vegnia er infurmà sch’insatgi bandunia l’interpresa. La gasetta infurmeschia dentant er dad innovaziuns tar RTR, novas emissiuns, novas ideas e projects e dettia era la pussaivladad da guardar davos las culissas da l’interpresa.

Mintgatant po il Cdp 
er crititgar ils auters

«Gli altri, ils auters, les autres, die Anderen» – uschia sa numna in’emissiun che vegn emessa da la RSI, dad RTR, dad RTS e dad SRF. Ils cussegls dal public da las uniuns purtadras da la SRG SSR han per ina giada guardà sur cunfin ed analisà las emissiuns che van sin auters emetturs.

Il Cdp da la SRG.R è vegnì a la conclusiun che tar RSI ed RTR saja quest’emissiun plazzada bain ed i dettia bunas infurmaziuns supplementaras sin lur paginas d’internet. Tar RTS ed SRF dettia quai anc potenzial da meglierar. Là na dettia quai strusch avis sin l’emissiun, per exempel en furma da trailers u sin la pagina d’internet. Quai saja donn, pertge l’emissiun sezza saja divertenta ed attractiva. I dettia buns temas ord las regiuns che fetschian gust sin dapli. L’auditur possia adina puspè far l’experientscha: «Aha, quai datti en la Svizra taliana/rumantscha/franzosa/tudestga.» Per vender anc meglier l’emissiun propona il Cdp da la SRG.R ina realisaziun audiovisuala, q.v.d. d’integrar videos curts (en il stil da Nouvo) e fotografias sin la pagina d’internet per uschia cuntanscher in public anc pli vast.

Adia ad Oscar Knapp

Il Cdp n’ha betg laschà passar l’occasiun d’engraziar ad Oscar Knapp, il president partent da la SRG.R, per sia gronda lavur. Knapp n’ha quasi manchentà nagina seduta dal Cdp, ha prendì fitg serius la lavur da quest gremi e stimà ella. Ses messadis ch’el ha adina puspè deponì en la seduta eran bain preparads ed il Cdp era uschia adina infurmà da quai che curra e passa en la SRG. Il president dal Cdp, Roger Tuor, ha surdà in pitschen regal a Knapp e giavischà ad el muments main turbulents ch’ils ultims onns cun la SRG.R.

Infurmaziuns davart il 
Cussegl dal public SRG.R

Il cussegl dal public è in gremi consultativ independent ch’accumpogna la lavur ed il svilup dal program dad RTR Radiotelevisiun Svizra Rumantscha cun constataziuns e propostas. Il cussegl dal public sa raduna per regla quatter giadas ad onn. El observa singulas purschidas da program, emissiuns ed offertas online dad RTR. Il Cussegl dal public SRG.R procura per in stretg contact tranter ils responsabels dal program ed il public. El sa cumpona da 15 commembers.