11avel preventiv dal cumün da Val Müstair

DA FLURIN ANDRY / ANR

A la fin da quist on esa precis desch ons daspö chi’d es entrada in vigur la fusiun dals ses cumüns da la Val Müstair. In marcurdi suottametta la suprastanza a la radunanza cumünala il preventiv 2019. Dürant l’on 2008 vaivan preparà las ses suprastanzas cumünalas da Fuldera, Lü, Müstair, Sta. Maria, Tschierv e Valchava la fusiun al cumün da Val Müstair. «Fin quella jada vaiva nempe mincha cumün sia administraziun cumünala autonoma, ma eir sia cumischiun da revisiun ed oter plü», as regorda Not Manatschal, il chanzlist dal cumün da Val Müstair. Perquai ha la Val Müstair decis sco prüma regiun in Grischun da fusiunar seis cumüns. A Büman 2009 es quella fusiun entrada in vigur. Daspö bainbod desch ons exista uossa il cumün da Val Müstair cun sias ses fracziuns, ils anteriurs cumüns da Tschierv fin Müstair. Avant co infuormar davart las investiziuns previssas dürant l’on 2019 dà il chanzlist ün sguard retrospectiv.

Trond a nüz las sinergias

«A lunga vista nu’s vessa gnü ingüna schanza da surviver cun avair tuot dubel e stradubel», disch Manatschal, «cun fusiunar però vaina pudü trar a nüz sinergias, p. ex. cun cumischiuns chi s’ha pudü schoglier e fundar invezza cumischiuns cumünaivlas per tuot ils ses cumüns.» Schoglier s’haja pudü eir la Corporaziun Regiunala Val Müstair chi s’occupaiva dals affars chi giaivan pro a tuot ils cumüns da la regiun. «Daspö bainbod ün decenni fan quai uossa per tuot la Val l’administraziun cumünala pella part operativa e la suprastanza pella part strategica.» Il prüm capo es stat Arno Lamprecht. Davo ot ons ha el surdat quella funcziun a Rico Lamprecht chi rapreschainta la Val Müstair eir a Cuoira al grond cussagl. L’administraziun cumünala es i’l Forum a Müstair, l’uffizi tecnic a Sta. Maria e la gestiun forestala a Valchava. Eir ils differents s-chalins da la scoula sun in plüssas fracziuns: La scoulina es a Valchava, la scola primara a Müstair e’l s-chalin ot a Sta. Maria. «In general s’ha la fusiun verifichada, la glieud, impustüt la generaziun giuvna, s’ha adüsada bain cul cumün fusiunà.»

Chantun surpigliarà la Via Prövis

In marcurdi saira a las ot vain salvada in sala da gimnastica a Tschierv la radunanza cumünala. «Id es l’ündeschavel budget cumünal cha no preschantain quella saira», disch Manatschal. I’l quint da success da quist preventiv prevezza il cumün pro expensas da 13,55 milliuns francs ed entradas da bundant 13,41 milliuns francs üna perdita da 144 300 francs. Il quint d’investiziun prevezza expensas da s-chars 6,3 milliuns francs ed entradas da s-chars 5,8 milliuns francs. El nomna duos dals progets chi sun da plü grond interess: «Il prüm es il sviamaint dal center dal cumün da Müstair cun agüd da la Via Prövis per ün import da 550 000 francs, da quels sun 275 000 francs contribuziuns chantunalas.» Quella via chi cumainza sur Forum passa suot il minz dal cumün oura e sbocca in vicinanza da la clostra Son Jon darcheu illa via chantunala. La Via Prövis nun ha amo il standard da vias chantunalas, ella nun es fabrichada per camiuns da 40 tonnas, perquai han il chantun e’l cumün da Val Müstair fat ün barat: «Il chantun surpiglia la Via Prövis e’l cumün la via tras la fracziun.»

Proget La Sassa fa part 
dal preventiv 2019

Büdschettà per l’on 2019 es, sco cha Manatschal cuntinuescha, eir il proget La Sassa/Minschuns: «Pel proget dal cumün da vacanzas sur Tschierv culla pendiculara sü Minschuns prevezzaina expensas dad 1,925 miliuns francs.» Pella contribuziun als Implants da sport Val Müstair chi mainan il territori da skis Minschuns contribuischa il cumün 1,3 milliuns francs. «Id aintran però eir contribuziuns per l’import da 3,375 milliuns francs, p. ex. our da la vendita da terrain», accentuescha il chanzlist, «ün’entrada considerabla fixada i’l preventiv resulta eir our da las taxas da fabrica, attachs e müdaman.» In quai chi reguarda il stadi actual dal proget La Sassa disch Manatschal cha’l resort da vacanzas sur Tschierv saja profilà e’ls investuors prevezzan da cumanzar a realisar il proget da l’on 2019.

La radunanza cumünala dal cumün da Val Müstair es in marcurdi, ils 28 november a las 20.00 in sala da gimnastica a Tschierv.