Ils lutgaders da la Mantogna a Maiavilla

(cw) La sonda proxima ha lieu a Maiavilla la scuntrada naziunala da gimnastica cun il Campiunadi grischun dals lutgaders giuvens, danov cun la Cuppa grischuna en la lutga. Las prenotas consistan da las disciplinas sigl aut e sigl lung, auzar la culla, balla medicinala, cursa pendulara ed exercizis libers. Il suentermezdi ha lieu la lutga. Ils gimnasts ed ils lutgaders giuvens da la secziun grischuna, dal club dals lutgaders dad Unterlanquart, da la Purtenza, da Razén e la secziun Mantogna sa scuntran cun ils concurrents da las secziuns parzialas da Son Gagl, da l’Appenzell, da Glaruna, Turgovia e Turitg/Schaffusa. En tut las quatter categorias han ils Grischuns schanzas realas da conquistar buns posts. Ils davos onns han ils lutgaders da la Mantogna cuntanschì mintgamai terzs posts, grazia a Jonas Patt en la categoria 1 e Christian Patt en la categoreia 2. Annunziads èn radund 70 giuvenils davent da las annadas 2003 e pli giuvens. L’entschatta da la lutga è fixada per las 08.30, la lutga sin matratschs entschaiva a l’ina.

(cw) Jonas Baumann (SC Tambo, Spleia) ha entschet la stagiun da la Cuppa mundiala 2018/2019 cun in 40avel post en il stil classic sin la distanza da 15 km. Ils emprims puncts da la Cuppa mundiala ha il sportist da Schons manchentà per pli pauc ch’ina minuta. La proxima fin d’emna ha lieu la cursa a Lillehammer en Norvegia.