La BCG avra la nova sedia regiunala Flem Laax

(cp) La Banca Chantunala Grischuna (BCG) avra oz, ils 27 da november 2018 sia nova sedia regiunala Flem Laax en il Center Stenna. La nova BCG a Flem unescha las anteriuras filialas da Flem Vitg e Flem Casa d’Uaul. Sin las clientas ed ils clients spetgan ina nova sala da clients concepida tenor ils basegns dal temp ed ina cussegliaziun intensivada. Cun questa avertura realisescha la BCG er a Flem il concept da filialas ch’ella ha introducì cun success a Glion, Landquart, Domat e Tusaun. «Ils motivs decisivs dad ir en il Stenna èn stadas la situaziun centrala en in lieu pulsant e la pussaivladad dad unir las duas filialas Flem Vitg e Flem Casa d’Uaul», commentescha Thomas Roth, commember da la direcziun, quest pass da la BCG.

Avantatgs per la clientella e per las collavuraturas ed ils collavuraturs

«La clientella po ussa nizzegiar tut ils servetschs bancars sut in tetg – en in’atmosfera attractiva e moderna», explitgescha Martin Cavigelli, manader regiun Flem Laax da la BCG. Sco ulteriur punct positiv vesa el l’infrastructura da lavur confurma al temp per la squadra da 13 collavuraturas e collavuraturs. «Quests avantatgs ans han persvadì ed intimà la BCG da far ina gronda investiziun en Flem ed en l’entira regiun», cuntinuescha Cavigelli. Cun ses nov concept da filialas reagescha la BCG sin ils basegns midads. Adina dapli clientas e clients utiliseschan chanals electronics per reglar lur affars da banca. En las filialas van els surtut per cussegliaziuns persunalas. Transacziuns sco retrair daners al spurtegl vegnan fatgas adina pli darar ed èn sa reducidas ils davos sis onns per var tschuncanta pertschient.

La nova sala da clients 
sco lieu d’inscunter

La nova sedia regiunala da la BCG a Flem porscha tut ils servetschs bancars sco investiziuns, finanziaziuns, provediment ed administraziun da la facultad. Las filialas reconcepidas da la GKB na disponan da nagins spurtegls classics. Enstagl datti ina recepziun moderna sco punct da contact central en la nova sala da clients. Qua po la clientella per exempel empustar cartas u far pajaments. «Grazia al nov concept da filialas han nossas collavuraturas e noss collavuraturs anc pli bler temp per la cussegliaziun persunala», declera Cavigelli. Ils cussegliaders sa movan libramain e beneventan directamain las clientas ed ils clients. In chantun cun lounge envida da far ina pausa e vegn nizzegià per tgirar il contact cun la clientella. Per discurs da cussegliaziun discrets stattan a disposiziun localitads adattadas en il segund plaun sura. Ir a la banca en il Stenna Flem daventa ina nova experientscha moderna per indigens e per giasts.

Automats moderns

Per transacziuns simplas stattan a disposiziun en la sedia regiunala Flem Laax apparats multifuncziunals. Els pussibiliteschan da far pajaments e retrair daners en francs svizzers ed euros cun scumpartiziun da las notas tenor giavisch, assegnar daners d’in conto a l’auter sco era consultar il saldo dal conto. En cas da basegn sustegnan ils cussegliaders a la recepziun las clientas ed ils clients. Ordaifer ils temps d’avertura è in automat accessibel en la zona da 24 uras.

Il contact persunal stat en il center – dapli soluziuns digitalas

La BCG Flem è averta da glindesdi fin venderdi, da las 08.00 fin a las 12.30 e da las 14.00 fin a las 17.00. «Discurs da cussegliaziun individuals èn pussaivels sin dumonda betg mo en las localitads da la banca, mabain er a chasa tar las clientas ed ils clients», accentuescha Cavigelli la muntada dal contact persunal. A medem temp investescha la BCG en sias purschidas digitalas per simplifitgar a las clientas ed als clients ils affars da banca. Exempels èn il center da clientella nua ch’ils clients pon empustar online daner contant e laschar trametter quel per posta a chasa u era fixar in termin da cussegliaziun.

Dapli davart las soluziuns online per reglar ils affars da banca da tuttas uras sin gkb.ch/digital