Prominent scolast da gimnastica

DA GION NUTEGN STGIER / ANR

Per dus lecziuns da gimnastica ò la scola superioura a Casti gia l’emda passada en nov scolast. Igl freestylist Elias Ambühl ò musso agls scolars e las scolaras varsaquants exercezis da gimnastica. Igl intent dall’acziun è da promover igl sport da freeski. Elias Ambühl, el tgi stat a Masein, è sto an Svizra egn digls gronds promotours digl sport da freeski. Avant diesch onns veva el antschet scu freestylist e cun sies sagls da slopestyle caschuno tar blers per attenziun. Adegna puspe ins vegia er detg ad el: «Ma te ist ple tgi angal nar», dei igl sportist da 26 onns. An curt taimp è el s’avanzo tar egn digls miglers atlets da freeski digl mond ed er tar egn da chels tgi ò savia veiver bagn digl sport da prestaziun. Cunzont an America è Ambühl davanto en veir star, en freestyilst popular ed er en sportist respecto dalla concurrenza. 30 gedas è Ambühl sto segl podest (diesch victorgias) tar cursas internaziunalas da slopestyle e big air. Tar las cursas x-games ad Aspen ò el gudagnea quatter gedas ena medaglia da bronz ainten la disciplina big air.

Spert, anc pi spert

Ambühl è er ena persunga tgi tot ò dad eir spert ed anc pi spert. Chegl cunzont schi el è sen igls skis e cura tgi el vo cun auto. Autos dalla marca Ferrari e Lamborghini, chels plaian anc oz ad el e cun da chels è el er sto savens per veia. Da preschaint è igl freestylist er la persunga tgi tigna cun 131 km/h igl record mundial dad eir oragiu d’ena pista segls skis e chegl anavos. Er chegl bagn ena tgossa pitost singulara e schizont sturna. Pi serious è alloura Ambühl sto l’emda passada cura tgi el ò visito la scola superioura a Casti.

Do bungs cunsegls

Siva tgi Ambühl era sto per dus lecziuns scolast da gimnastica ad Arosa, Favogn e Tusang, lò noua tgi el ò fatg la scola secundara, è la sia proxima staziun stada Casti. Bung 60 minutas ò mintgamai cuzzo la lecziun da gimnastica cugl scolast prominent. I seia da cunsiglier da betg gist antschever dalunga cun igls exercezis, persiva far muvimaints adattos per scaldar e stender las musclas. Graztga a chels exercezis da preparziun seia igl prievel da sa blessar per en po pi pitschen, ò detg Ambühl agls scolars e las scolaras. Fatg ò el cun las mattas ed igls mats alloura er varsaquants exercezis tgi on gia da far cun balantscha, muvimaint, concentraziun, stabilitad e forza da sagleir. Igl sportist ò sez musso scu tgi igls exercezis fetschan per en po daple senn ed er adegna puspe fatg las correcturas basignevlas cun vurdar pi stagn sen igls muvimaints e sagls da scolars e scolaras. An mintga cass on igls mats e las mattas gia igl pi grond gaudi cugl star da slopestyle e big air.

I dat en camp per freeski

Igl intent dallas lecziuns da gimnastica cun Ambühl è er da promover igl freeski e da far chel pi ancunaschaint aint igl Grischun. Cun Arosa Pendicularas SA e Lai Pendicularas SA segna igl sportist per la realisaziun digl camp da skis da freeski tgi ò li digls 20 anfignen igls 22 da favrer ad Arosa. Daple da chel ins catta sen la pagina arosalenzerheide.swiss/snowpark.

A Casti ò Ambühl er communitgia tgi el sa reteira digl sport activ per sa deditgier daple alla sia famiglia. A disposiziun stetta el anc per films e reclamas da tot gener ed er scu co-commentatour da cursas da freeski tar SRF.