Punts els milliuns

«7,5 milliuns? Tgei vul far! Era quei va atras senza nuot» va la tuna e sco ei para fan plirs pugn en sac.

«Da principi sundel buc encunter, aber…».

«Duein far tgei ch’ei veglien, aber…»!

«Jeu hai fatg il miu. Quei duei la generaziun giuvna decider…».

«Manegias ti ch’jeu prendi posiziun avon l’entira radunonza e stetti suenter cheu sco il pli grond idiot?… emblida…»!

«Matei ch’jeu gitgel miu meini… eis farucs!»

Ei para ch’ils da Laax seigien secavistrai egl agen success. Che la vischnaunca da Laax hagi raps ei negin misteri. Denton tgei che la vischnaunca fetschi cun quels maguna da meins a bein enqual pagataglia da Laax.

Ch’ina scua nova scui bein ei savida generala. Denton che la scua nova scui mintgamai milliuns tier mintga scuada, gliez plaigi buca pli e tuchi plaunsiu era als da Laax sil viv.

Bia buns projects han quels milliuns possibilitau ed han dau in niev «schwung» al pragmatissem dils davos onns.

Mo daco pil gianter sezuppan quellas da Laax e quels dils Libers lu tuttenina davos la tactica dalla gatta morta? Haver han ei gie tut!

Sco ei para mondi tut memia spert: cheu credits da milliuns, leu credits da milliuns, projects sin rucca e projects sisum en truchet ch’ins vegni tut stuorns!

Il sturnezi actual dils da Laax seigi ina summa da 7,5 milliuns per realisar ina punt da lenn da bien dus kilometers tras uauls e tschemas indigenas. Votau vegn proximamein, senza scrutini.

«Pertgei buc! A mi sa quei esser tuttina, aber…».

«Ussa veinsa grad dau o tons milliuns per…»!

«Che la vischnaunca investeschi ei bien ed endretg, aber…».

«Fuss pli tschec da…!» ed aschia senza fin!

Dalla gagliardia e nunprevedibla luna dils «fasierlis da Laax» d’antruras, sco ei vegn palesau, quei instinct gigin democratic ei para ius en ruina. Tut mo historia ed historias. Malgrad tut fetschi beinenqual da Laax momentanamein pugn da met e d’asch en sac!

Donn!Remo Arpagaus, Laax