Renovaziun da la chasa pravenda a Scuol es gratiada

DA BENEDICT STECHER / ANR

Minchün d’eira invidà da la Corporaziun evangelica da Scuol ad üna visita da la chasa pravenda renovada. A la radunanza generala es gnü approvà il preventiv pel 2019. La buna liquidità da la Corporaziun evangelica da Scuol ha sport la pussibiltà da renovar ed adattar la chasa pravenda sü Vi a Scuol. Il president da la corporaziun Peder Rauch ha surdat a l’architect Peter Langenegger l’incumbenza da far ün stüdi cun pussibiltats da renovaziun. Langenegger es gnü tschernü impustüt eir causa ch’el as vaiva occupà fingià plü bod cun quella chasa. A la radunanza da preventiv dals 4 november 2016 es gnü preschantà il proget da fabrica tenor ils giavüschs dal consistori. Quel proget es gnü discutà ed adattà cun perits e cun la Chüra da monumaints dal Grischun. Il böt d’eira da laschar intacta la structura originala da la chasa e da realisar duos invezza da trais abitaziuns. Davo üna discussiun fich critica ha la radunanza deliberà ün credit per la progettaziun. In favrer 2017 ha preschantà l’architect ün proget detaglià cun ascensur e sainza isolaziun da las fatschadas cun trais variantas. Eir quel proget ha dat andit a discussiuns plütost negativas. Duos mais plü tard es gnü preschantà ün proget reelavurà chi ha chattà l’acconsentimaint da la radunanza.

Credit da 960 000 francs

Davo divers sclerimaints a reguard la finanziaziun dal proget ha quel pudü gnir realisà. La baselgia chantunala garantischa 10 pertschient subsidi e la banca es pronta da finanziar l’intent cun üna perizia da cuosts da 960 000 francs. D’utuon 2017 s’haja lur cumanzà cun la realisaziun e sper l’architect Langenegger d’eiran ingaschats eir Claudio Bulfoni e Marisa Feuerstein. Il quint final nun es amo avantman, ma i vain fat quint davo ün pêr discaps cun cuosts da bundant ün milliun francs. Ils respunsabels han muossà grond respet invers la suprastanza da fabrica in möd cha tuot quai chi’s ha pudü dovrar es gnü salvà e renovà. Pro’l di da las portas avertas han ils preschaints pudü s’atschertar da la reuschida da la fabrica.

Preventiv cun üna perdità 
da 23 500 francs

Il president da la Corporaziun evangelica Scuol-Tarasp, Peder Rauch, ha orientà davart ün inscunter cun las fracziuns cunfinantas. «No vain decis da collavurar sül chomp administrativ, voul dir no lessan 
s-chaffir ün secretariat cun üna plazza da var 40 pertschient. Dals 80 000 francs cha quel post cuostess surpigliessan Ardez fin Guarda üna part, Sent e Scuol il rest.» Il consistori ha eir discutà la pussibiltà d’activar ils arrandschamaints in sala illa chasa pravenda. «No eschan da l’avis cha quista sala saja ideala per occurrenzas. No vain fingià uossa gruppas chi fan adöver da la sala per arrandschamaints e no lessan activar la vita religiusa-culturala cun referats ed oter plü.» Il preventiv pel 2019 es gnü preschantà dad Adrian Barbüda chi’d es respunsabel per las finanzas. Il preventiv as preschainta plü o main sco quel da l’on passà cun müdamaints pro’ls fits dals debits e pro otras posiziuns cun üna perdita da 23 500 francs. Il preventiv es gnü approvà sainza cuntravuschs.

La chasa pravenda a Scuol datescha dal 1656, visibel süllas consolas dal portal principal. I’s tratta oriundamaing dad üna chasa à Porta. Davent dal 1850 vaiva üna famiglia Arquint manà la chasa sco pensiun cun nom «Zum schwarzen Adler». Il nom d’eira probabel üna concessiun a giasts da l’Austria. Dal 1871 vaiva lura ün Plazer surtut la chasa e drizzà aint quella sco bacharia. Pac davo, dal 1875 ha il cumün cumprà il fabricat cun l’intent da tilla dovrar sco chasa da pravenda. Dal 1950 es la chasa gnüda surtutta da la Corporaziun evangelica Scuol chi ha uossa realisà la renovaziun.