Patinunzs scu furmeilas

DA GION NUTEGN STGIER / ANR

Luvro scu anc mai ins ò igl davos onn da gestiun cunzont tranter Nadal e Bumang. Adegna daples giasts ed indigens fon adiever dalla veia da glatsch tranter Alvagni Bogn e Surava. Igl anviern 2017/18 èn nias fatgs 25 000 viadis cun las patinas. Chegl è nia ancunaschaint tar la radunanza generala dall’Uniun skateline Alvra. Eir cun patinas tras ena cuntrada particulara e sa diverteir è daveiras en’attracziun tgi dat betg gist ainten mintga destinaziun turistica. An nossa regiun è chegl pussebel gio siva digl 2002 graztga alla «Skateline Alvra», igl vial da glatsch tranter Alvagni Bogn e Surava cun ena lunghezza da 3 km. Igl tratg da glatsch è an tots gros ena anritgeida per la purscheida turistica ed è popular tar vigl e gioven scu er tar giasts ed indigens. Ena persunga tgi ò investo bler taimp ed er realiso la «Skateline Alvra» è Giorgio Bossi. Cun tge plascheir ed entusiassem tgi el magna l’uniun e chel travagl scu president ins ò er vasia tar la radunanza generala dall’emda passada. Menziunar ins dastga er la gronda solidaritad da chels da Surava ed er da bleras persungas dallas vischnancas vaschignas anvers la skateline Alvra. Avant, durant e siva dalla staschung, per l’uniun e pigl vial da glatsch per lung dall’Alvra è vigl e gioven pront da luvrar, da s’angascher e da sa mussar solidaric e chegl ossa gio 18 onns. An chella tgossa mareta mintgign grond respec.

Stada 65 deis averta

Da deir è alloura er tgi Bossi ò a disposiziun en team fido, donnas ed omens tgi èn er fascinos digl vial da glatsch e tgi s’angaschan per chel cun bler elan. Igls numerous voluntaris vegian er igl anviern 2017/18 gia gronds marets tgi igl travagl vegia funcziuno excellent, ò detg igl president. Digl reminent on igls voluntaris luvro 552 ouras per preparar e mantigneir igl vial da glatsch. Las persungas tgi on luvro davant e davos las culissas, chellas on fatg an tot 649 midadas da lavour (Arbeitsschichten). Averta è la skateline Alvra stada 65 deis, exact tants deis scu igl anviern avant 2016/17. An sies rapport annual ò Bossi cunzont menziuno er la buna collaboraziun cun igl cumegn Albula/Alvra tgi seia eneda daple stada buna. Er la collaboraziun cun las uniuns turisticas da Savognin, Lai, Barvogn e Tavo seia danovmaintg stada exemplarica. Igl cumegn seia puspe sto pront da surpiglier la mesadad digls costs per la carta da staschung per unfants indigens, dalla quala i seia nia fatg grond adiever graztga a chella acziun. I seia en fatg plaschevel tgi igl cumegn fusiuno seia fitg avert anvers la skateline Alvra, chegl tgi seia betg cun sasez, ò detg Bossi. Ludo ò el er la generousadad digls varsaquants sponsours principals scu per exaimpel la lenna Florinett SA da Barvogn.

En de cun 900 viadis

Cun ena vendita da total 25 000 viadis (bigliets) ò igl travagl gia en nov record siva tgi dat la skateline Alvra. Patinunzs scu furmeilas ins ò cunzont gia tranter Nadal e Bumang cun daventar igl vial da glatsch adegna ple en’alternativa tar igl eir cun skis. Da Bumang 2018 ò la skateline gia en de da record cun 900 viadis. «Nous ischans ple tgi cuntaints d’aveir gia ossa dus bungs onns l’egn sen l’oter», ò accentuo Bossi. Igl anviern 2016/17 ins veva gia ena frequenza da 17 000 viadis e la staschung 2017/18 gist 8000 daples, chegl seia strousch da creir, ò detg igl president tot cuntaint. Tgi SRF vegia emess allas 19.00 ainten l’emissiun «Schweiz Aktuell» direct davent dalla skateline, chegl seia stada ena fitg buna tgossa dalla quala igl travagl vegia er profito, ò detg Bossi. Da preschaint vegia er Svizra Turissem interess da neir a Surava per filmar la skateline, per far neir ancunaschainta chella a tots chels tgi canoschan betg anc chella purscheida turistica an Val Alvra. Er da chella acziun naziunala ins niss bagn a profitar, manegia Bossi.

296 pêr patinas

Damai è igl anviern 2017/18 sto an Val Alvra en veir boom d’eir cun patinas. Er tar nous sa mossa veaple tgi igl giast vign betg angal ainten la regiun per eir cun skis, mabagn vot el sa diverteir, far daples sports, aveir aventuras e sa lascher eir bagn er culinaric. Sa musso è la davosa staschung dalla skateline Alvra er tgi adegna daples uniuns, clubs e societads fon adiever dalla pista da glatsch tranter Alvagni Bogn e Surava. Savens vign la patinada alloura er cumbinada cun ena tschagna ainten l’ustareia dalla skateline a Surava. Menziuno ò Bossi er tgi en de ins vegia ampresto 296 pêr patinas, chegl tgi seia er sto en nov record.

Fatg da nov la fatscheda

L’uniun seia ainten ena buna situaziun finanziala, chegl er cun aveir fatg adegna puspe resevas. Uscheia è er sto pussebel da far da nov la fatscheda digl restorant dalla skateline. Fatg ins ò chella da lenn e cunzont er cun blera lavour voluntaria. Investo è er nia ainten novas maschinas per far igl glatsch e per rumager la neiv digl vial. Sen la staschung tgi stat avant porta survignan igls commembers dall’uniun ed igls voluntaris er novas giaccas. Agiunto vign er mintg’onn igl domber da patinas, da gleischs da front e da paraschanuglias. Cun antradas da 307 668 francs ins ò sa tgapescha er fatg igl pi grond stgamgiamaint siva digl 2002, chel onn tgi la skateline Alvra è neida surdada l’amprema geda agl travagl. Naturalmaintg tgi las expensas èn er s’augmentadas, sa resulto è alla fegn finala tuttegna en gudogn. An reseva ins ò mess 48 000 francs.

Reelecziun dall’antiera suprastanza

Igls preschaints on er gia d’eliger las persungas tgi appartignan alla suprastanza. Pigl bienni digls proxims dus onns è nia confirmo Giorgio Bossi scu president dall’uniun. El veiva per l’uniun e per la skateline ed el è er chel tgi teira igl tgar. Reeligias an lour uffezis èn er nias Luzi Schmid, Claudio Bossi ed Urs Oeschgen. Confirmada scu actuara è neida Martina Brazerol. Revisours restan Reto Crameri e Luca Casutt. L’avertura dalla staschung 2018/19 è fixada sen igls 23 da december.