Savognin derva fanestras decoradas

(pb) Sonda proxima è igl 1. da december. Chel de antscheva igl advent. Chel taimp tgi è decoro ed illumino an spezial per dar daple gleisch agl taimp vers Nadal. Calenders d’advent per darveir mintga de ena fanestra ins canoscha gio dadei. Er tradiziun on fanestras d’advent ve dallas tgesas. Per mintga de egna. Chest onn er a Savognin. L’Uniun da donnas Savognin ò an tot passa 100 commembras. An divers status. Seia chegl activas, interessadas e passivas. Tranter las activas è er ena gruppa da program. Damais chella gruppa tgi varda er tgi marscha ensatge durant igl onn ed elaborescha ideias e preschainta chellas alloura alla suprastanza. Ainten chella gruppa fò er part chest onn Ramona Schaniel. Ella ò gia l’ideia da far puspe eneda fanestras d’advent a Savognin. Gl’è gio schi dei anavos tgi gl’è nia fatg fanestas d’advent tgi las giovnas mianc sa regordan ple.

Cun grond angaschamaint e gronda passiun è Schaniel eida vedlonder ed ò survagnia per la sia ideia sustign dalla suprastanza.

Betg schi simpel da mutivar

Gio la stad è ella eida vedlonder e chegl principalmaintg cun angaschamaint persunal. La gronda sfida è stada eneda da procurar tgi chestas 24 fanestras vignan er realisadas ed alloura da communitgier chegl per tgi ossa tgi las fanestrtas vignan davertas seia er ensatgi tgi geia a las vurdar. Giasts ed indigens duessan er saveir noua tgi chella fanestra tgi vign mintgamai daverta durant chels 24 deis sa catta.

Igl amprem ò ella contacto las commembras dall’uniun da donnas. Igl resung seia pero sto pulit maier. Angal singulas vevan s’annunztgia. Anfignen igls 10 d’avost veva ella anc betg la mesadad per realisar las fanestras. «Ia era persvadeida tgi chegl seia ensatge bel ed ensatge bung e tgi chegl stoptga esser pussebel da dar chest segn d’advent ainten ena vischnanca cun passa 800 abitants», ò managea Schaniel. Uscheia è ella eida en’otra veia ed ò scretg sen igls differents canals er a betg commembras ed ad affars la dumonda dad ena participaziun cun ena fanestra d’advent.

«Ia veva nign preventiv per chel project, va pero via tgi i duvrava tuttegna er finanzas. Per exaimpel schi ins vot publitgier igl program dallas fanestras d’advent ainten la gasetta turistica «Aktuell». Ella ò alloura contacto persungas privatas, interpresas ed affars per en sustign. Ella è stada surstada digl resung. Er otras persungas eran, scu ella, persvadeidas tgi chegl fiss tuttegna ena bela tgossa e gl’è nia ansemen en importo da 2500 francs. Chels èn nias duvros per activitads an connex cun igl marketing.

Betg la davosa geda

Tenor igl program tgi è nia communitgia damais antras igl inserat aint igl «Aktuell», igls flyers repartias ed igls placats tgi l’inizianta ò er pandia se sezza ainten divers lis è ossa per mintga de digl advent ena fanestra. L’amprema è chella dall’uniun da donnas ainten l’anterioura tgesa da cumegn noua tgi l’uniun da donnas ò er ena stanza. Siva vogl mintga de ensanouas tras vischnanca. Betg tenor en turnus fix, mabagn casual. I sa tracta betg angal da persungas singulas tgi dervan ena fanestra. Dasperas las commembras ègl er donnas betg commembras, affars ed instituziuns. Gl’è er uscheia tgi mintgamai tar chella fanestra tgi derva la dumengia dattigl en apertitiv organiso ed alloura dattigl er anc tar otras fanestras tgi vign purschia spontanamaintg ensatge.

Ainten la realisaziun dallas fanestras ò mintgign gia mang liber per la sia creativadad. Schi el ò lia restar pitost tradiziunal u esser en gnoul modern, glez era tgossa da mintgign.

Las fanestras vignan avertas mintga seira allas 18.00 e restan illuminadas anfignen minimal las 22.00.

Program d’avertura dallas fanestras d’advent

1. Uniun da donnas Savognin,

Veia Naloz 1

2. Ramona Schaniel, Veia Viols 6*

3. Doris Guetg, Veia Canetel 24

4. Surses Alpin, Veia Son Barnagn 2

5. Graziella Luzio, Veia Strada 5

6. Studio cosmetica Ingrid,

Veia Segantini 4

7. Daniela Züger, Veia Sot Spondas 6

8. Uschi Arpagaus, Veia Sot Tga 2

9. Ros. Guetg/Alex. Disch,

Tga Naloz 17*

10. Scola da skis Savognin,

Veia Curvanera 2

11. Hobby Kiosk, Stradung 13

12. Center da Sanadad, Stradung 52*

13. Scoligna Surses, Veia Curvanera 2

14. Biro turistic Savognin, Stradung 42

15. Fadrina Caspar, Veia Somareiva 2

16. Bruna Rhein, Veia Tect 9*

17. Kathrin Hefti, Veia Tgaplottas 2

18. Christina Peterelli, Veia Sur Ual 16

19. Sandra Luzio, Veia Son Mitgel 16

20. Giulia Pupikofer, Veia Viols 10

21. Hotel Danilo, Sradung 20

22. Nora Netzer, Veia Tgampi 3B

23. Tamara Wasescha, Veia Naloz 19*

24. Biblioteca populara, Veia Grava 2A*

* cun aperitiv