Secunda emprova da reunir la Cadi

Da Hans Huonder / anr

L’jamna vegnenta ei sessiun dil cussegl grond e cun occasiun da quella tracta il parlament il rapport davart las structuras communalas. Quella fatschenta vul il deputau René Epp nezegiar silsuenter per far in’ulteriura emprova d’ina pli stretga collaboraziun ni schizun fusiun da vischnauncas ella Cadi. Avon exactamein dus onns ei l’iniziativa cul tetel «contractivas da fusiun ella Cadi» vegnida inoltrada cun 900 suttascripziuns. Enconuschentamein ha quella giu negin success. Tuttas vischnauncas ein stadas dil meini ch’il temps per in tal pass seigi buca madirs e necessaris. Ussa fa in dils coniniziants da lu – il deputau René Epp – ina nova emprova en quella direcziun. «Suenter la sessiun dil cussegl grond da l’autra jamna less jeu clamar ils presidents communals e deputai dalla Cadi ad ina discussiun. En quella less jeu tematisar aunc ina ga la damonda d’ina pli stretga collaboraziun ni eventualmein fusiun dallas tschun vischnauncas sisum la Surselva», di Epp. Sch’ei detti danovamein in na seigi la caussa giud meisa pil mument, cass cuntrari stoppien ins mirar co cuntinuar: «En cass d’in consens positiv savess ins incaricar in biro specialisau cun in’evaluaziun dallas pusseivladads. Quei sa, sto denton buc esser ina fusiun da tuttas vischnauncas. En mintga cass duess vegnir luvrau lu vid ina visiun.» Ella scuntrada previda lessi el sentir il puls dils presidents communals e deputai.

Pagina 3