Success per la moziun da Martin Candinas

(sda/anr/vi) La posta sto esser sin il pli tard fin las 12.30 en tuttas stgaffas da brevs. Quai pretenda il parlament ch’ha assegnà ina moziun da cusseglier naziunal Martin Candinas al cussegl federal. En autras domenas na less il cussegl dals chantuns dentant betg sa maschadar en. Il cussegl naziunal ha acceptà la primavaira gist quatter moziuns che pertutgan la posta. Trais da questas intervenziuns ha il cussegl dals chantuns refusà ier. Cun questa decisiun èn quellas giu da maisa.

Cunter la veglia da la cumissiun

Cun 24 cunter 14 vuschs e duas abstenziuns ha la chombra pitschna dentant acceptà la moziun da Candinas. El pretenda che la posta arrivia mintgamai fin las 12.30 sch’i na dat en ina regiun nagina spediziun da gasettas da la damaun. 
La cumissiun predeliberanta aveva refusà la moziun. Grazia a mesiras da La Posta arrivian gasettas abunadas gia oz fin mezdi en la stgaffa da brevs. Uschia saja il giavisch principal ademplì, ha argumentà Claude Janiak (ps/BL) en num da la cumissiun. Sch’il temp vegnia fixà en la lescha limiteschian ins senza necessitad il spazi d’agir da La Posta.

Plinavant èsi vegnì fatg attent che Urs Schwaller haja sincerà che La Posta sa stentia en l’avegnir dad arrivar ad uras. Ins possia sa fidar dal pled dal president dal cussegl d’administraziun damai ch’el haja sco anteriur cusseglier dals chantuns in tschert sensori per il service public.

D’in auter avis è stà Beat Rieder (pcd/VS): «Per mai sa preschenta La Posta sco concern che sa retira ord las regiuns periferas.» La Posta ageschia oz anc adina tuttina sco avant quatter onns. Entaifer las ultimas emnas haja el survegnì telefons gist or da duas vischnancas nua che La Posta veglia serrar ses uffizis. E che la posta arrivia magari pir suentermezdi en regiuns periferas na saja nagina raritad. Era da parlamentaris da la Romandia ha la moziun Candinas survegnì grond sustegn.

Romandia sustegn Candinas

Suenter ch’era la chombra pitschna ha ditg gea ier a sia moziun è Candinas vegnì interrogà gist en roda da schurnalists da la Romandia, dal Tessin e dal Grischun ed el ha stuì dar pled e fatg gist en tuttas quatter linguas naziunalas. Ch’el cuntanschia in uschè bun resultat en la chombra pitschna n’haja el betg spetgà, di Candinas a l’anr. La Posta haja fatg stentas encunter sia moziun per tema che lezza restrenschia memia fitg l’interpresa. «Uss hai jau sa chapescha plaschair ch’ins vesa en il parlament che la glieud vul avair ina gasetta abunada fin mezdi en la stgaffa da brevs.»

Davart il sustegn dals parlamentaris da la Romandia di Candinas: «Sch’i va per il service public ha la Romandia ina gronda chapientscha ed in bun sensori. Ils parlamentaris da la Romandia èn er adina pli averts da dar tschertas directivas dal stadi anora.» Gist quai saja la sfida en connex cun La Posta. Lezza na saja betg in uffizi statal ed era betg in’interpresa spirontamain privata. Perquai stoppian ins chattar in equiliber e tscherts puncts stoppia la politica simplamain dar avant a La Posta. «Ins na po betg adina dir l’economia decida sezza», concluda il politicher grischun. «Igl è er impurtant per La Posta da vesair nua ch’il parlament metta la paisa.»