Viadi dalla pleiv da Mustér ellas Indias

Dacuort essan nus returnai d’in viadi ellas Indias organisaus entras la pleiv da Mustér. Daco gest las Indias? Il plevon, sur Georg, derivonts da Kerala, ha vuliu dar la pusseivladad da mussar a nus Europès sia patria. La decisiun digl uestg da Cuera da buca pli prolungir il contract cun sur Georg Changeth sco plevon da Mustér ha schau dubitar in mument schebein quei viadi vegni insumma menaus atras.

Las Indias ei ina tiara immens gronda cun 1,3 milliardas habitonts. La gronda part dad els ein hindus ed ina pintga minoritad cristians. El nord havein nus visitau il «triangul» Dehli, Agra, Jaipur. 20 milliuns visetan annualmein il Taj Mahal ed era quei di fuvan nus buca persuls sil plaz. Magnific ei il ver plaid per quei edifeci. Mo era il tempel da Lotus ed in Quatab Minar, ina dalla pli aultas tuors dil mund islamic, han fascinau. Sper tempels, moscheas e palasts havein nus era visitau la fossa da Mahatma Gandi, il grond menader e pacifist dil moviment d’independenza dils Inders, assassinaus 1948, in miez onn suenter la fin dil domini colonial britanic sur dall’India. Fascinai essan nus era stai dil Jantar Mantar, igl observatori astorolic che stat sut il patrimoni cultural mundial. Ina aventura tut speciala ei l’excursiun cun «rickshas» – umens cun velo cun davostier plaz per duas persunas – el reservat d’utschals staus. Sin via in traffic caotic, mo da sesmarvigliar ch’ei funcziunava senza veser in soli accident!

Con variontas che las Indias ein, havein nus era saviu far persenn cura che nus essan sgulai el sid dalla tiara, a Kerala. Cheu domineschan ils uauls da palmas da cocas, las barcas casa, las reits da pescadurs, las baselgias cristianas. A moda zun cordiala essan nus vegni beneventai digl uestg da sur Georg, Josua Mar Ignatios. A mintgin e mintgina da nus ha el surdau in schal, simbol da gronda stema e simpatia per nus Svizzers. Il vicari general, assistius dil secretari digl uestg, il cancelier ed il chef da finanzas han surviu cun gronda gentilezza in bien gentar. Il survetsch divin festiv cun uestg Josua e nos treis spirituals dalla gruppa vegn era a restar a nus aunc ditg en memoria.

A Kerala havein nus astgau festivar in survetsch divin en ina baselgia nua ch’ina reliquia da sogn Tumasch sesanfla. Quel ha purtau gia ils onns 52 la buna nova ellas Indias.

Il plascher dils habitonts, dils geniturs e parents el vitg da sur Georg ei buca staus da surveser. Cun buns fretgs e cun ina nusch da latg coca essan nus vegni beneventai cordialmein.

Ussa restan las regurdientschas cun fotos, seida, odurs da spezarias ed auter pli. A sur Georg ed a Rita Furger engraziel jeu per l’organisaziun e per la broschura fatga aposta per quei viadi. Igl ei stau in variont ed interessant viadi en ina tiara ed ina cultura per ils biars da nus aunc nunenconuschenta – l’India ei a nus uss in toc pli damaneivel.

E per finir aunc ina communicaziun: Sco quei che Rita Furger ha palesau a mi ha ella ediu ina pintga broschura cun varga 20 priedis da sur Georg ch’el ha teniu ils davos dus onns en sia pleiv a Mustér. Quella broschura san ins retrer per diesch francs (prezi da producziun) naven dils 3 da december en papetaria Andrea a Mustér ni directamein dall’autura.

Iso Tuor, Glion