Per viadis sul fil cun survesta enorma

(anr/sr) Tiel davos legn che purtava il tetel «vischnaunca cun svilup enorm» havein nus tschercau Laax cul Lag Isla a Murschetg ed il Lag Grond el vitg. La vesta da fotografar ord in ballun d’aria caulda era surprendenta e nova e probablamein ha la foto irritau bravamein ils participonts dil legn, pertgei aunc mai han tons inoltrau rispostas fallidas sco quella ga. La perspectiva da surengiu arva propi tut autras vestas ed ins sto mirar bein tgei ch’ei nua. Aschia fuva per exempel il Lag la Cauma ch’ei vegnius numnaus enzacontas ga insumma buca da veser silla fotografia dil legn digl october. Sco soluziun ei era il Lag digl Oberst vegnius numnaus, mo era quel era buca visibels silla foto, sulet il contuorn da quei lag. Il Lag digl Oberst ei in lag cun paliu sut il vitg. Persuenter era il Lag Isla a Murschetg da veser davon silla foto. El ei in lag artificial dall’Ovra electrica Bargaus ch’ei vegnida construida il 1962 sin intschess dallas vischnauncas Laax e Sagogn. Quei laghet vegn era numnaus lag «Ual da Mulin», aschia che nus havein secapescha era schau valer quei num sco soluziun. Murschetg fuva gia el temps medieval in uclaun habitau. In num da famiglia Murtschickh ei documentaus a Sagogn dapi il 16avel tschentaner. Il tratsch da Murschetg ei denton ordvart schetgs e carpus, aschia ch’igl ei era buca sclaus che Murschetg fuva oriundamein il «munt» (cuolm) schetg. Il pli vegl sigil ed ils pli vegls documents tradeschan aunc la vera derivonza dil num dalla vischnaunca «Laax» – quel deriva numnadamein da «Lags». La fuorma «Lax» cumpara pér sin in sigil duvraus suenter 1424 e la fuorma «Laax» schizun pér el 16avel tschentaner. Il lag (Lag Grond) vegn numnaus per l’emprema ga en in document 1434 cura ch’ils Libers da Laax han regalau agl uestg da Cuera il lag sul vitg. El Lag Grond anfl’ins era il glischun, igl animal d’uoppen dalla vischnaunca da Laax. Il tetel dil legn fuva «vischnaunca cun svilup enorm», pertgei aunc all’entschatta dils onns sissonta era Laax in vitg muntagnard idillic e pauper cun 300 habitontas e habitonts. Oz dumbra la vischnaunca ina populaziun da quasi 2000 persunas ed ei in liug da vacanzas e da sport da renum internaziunal.

Legn dil november

Oz mussein nus la foto d’in cuolm che lubescha da guder viandond sil fil ina magnifica survesta silla Surselva, sil Tödi e biars auters pézs. El ei contonschibels partend naven dalla vischnaunca da Medel ni Sumvitg. En ina dallas vischnauncas dat ei perfin in campadi ch’ha num sco il cuolm che nus tscherchein. Anecdotas e historias da nossas lecturas e da nos lecturs fagessen sco adina grond plascher. Tgi ch’enconuscha il cuolm tschercau duei scriver la risposta sin ina carta postala e tarmetter quella tochen ils 13 da december 2018 a: La Quotidiana, Susi Rothmund, Via Foppa 15, 7176 Cumpadials. Grazia a generus sponsurs savein nus era porscher quest meins tschun attractivs premis pils victurs dil legn mensil: Duas cartas dil di regaladas dalla Skiarena Andermatt Sedrun, duas cartas dil di regaladas dil territori da skis Mustér 3000, ina carta dil di dil territori da skis en Val S. Pieder regalada dallas Pendicularas Vals3000, in bon ella valeta da 36 fancs (entrada el parc da sugas) dil Center da sport a Flem ed in bon ella valeta da 30 francs da Tea Time by Miraval a Sumvitg. Engraziel fetg als sponsurs! La soluziun vegn publicada il davos venderdis digl onn 2018 cul proxim legn. Bien cletg!