Priedi da sur 
Giusep Venzin 
da Medel

La dumengia vargada ha la baselgia catolica festivau la fiasta da Cristus retg. Jeu hai udiu en mia veta da cardientscha bia priedis, buns e schliats, dulschs e naivs. Il priedi da sur Venzin dalla dumengia vargada ha schau gizzar mias ureglias e tratg mi’entira attenziun sin ses plaids. All’entschatta da siu priedi muossa sur Venzin vi sin la corrupziun e suppressiun dils regents dil temps da Jesus, in temps nua ch’il sempel carstgaun haveva negins dretgs ed era dil tuttafatg suttaposts allas lunas dils regents. Quels regents eran pil pli corrupts ed inhumans. Savens schavan els sentir lur repressiun. Fuss sur Venzin denton staus mo tier quels patratgs fuss siu priedi buca staus in priedi special. Per criticar temps vargai drova ei zun negina curascha. Ils accusai ein gie daditg sut tratsch e san aschia buca persequitar ils denunziants. Mo sur Venzin fa en ses patratgs ina parallela cun la situaziun hodierna e numna differents stadis nua ch’ei regia la medema situaziun. El denton numna buca mo ils stadis, na el numna ils dispots, tirans, autocrats ed oligarchs per num. Ina tala aviartadad e curascha secapescha buca da sesez. Era en stats democrats e cundiziunals maunca savens la curascha tier l’aviartadad. Il suveran sezuppa tier critica pli bugen davos nums anonims sco p. ex. il stadi, la baselgia, l’economia ed aschia vinavon. Mo davos quels nums anonims stattan persunas ch’ein u culpontas ni responsablas pigl abus. Numnar ellas per num sesnueschan ils denunziants per il pli. Sin tala moda eviteschan els ina directa confruntaziun cun ils accusai.

Podà ch’enqualin present tier quei survetsch divin ha anflau il priedi memia politisau ed ei dil meini che politisar s’audi buca sin scantschala. Mo gest quels tals han buca legiu ni buca capiu il Niev Testament. Ha buca gest Jesus defendiu cun vehemenza giustia e dretg human? Eis el buca gest per quei engaschi vegnius persequitaus e crucifigaus? Ed ein buca gest valurs sco migeivladad, giustia, mudestadad e perdunament valurs eticas che s’audan tier ina religiun? Sur Venzin ha suenter quella attacca prest anflau il caraun e cuntinuau siu priedi cun mussar vi sin Jesus sco retg dalla pasch, dalla giustia e dalla migeivladad. Chapeau sur Venzin.

Robert Casanova, Disentiserhof, Mustér