«RTR Purple Nights»: Scuntrada 
da suns classics ed electronics

(cp) In concert en ina localitad speziala nua che musica classica sa scuntra cun musica electronica? L’eveniment «RTR Purple Nights» datti proxima sonda, il 1. da december a partir da las 20.30 en la Terma da Val. Il public spetga in concert sin l’aua cun musica da l’Ensemble Viola enturn David Sontòn Caflisch e cun l’artist da musica electronica turitgais Cella.

Radiotelevisiun Svizra Rumantscha (RTR) organisescha numnadamain in concert unic: L’artist da musica electronica turitgais Cella e l’Ensemble Viola da Caflisch, gughegian l’experiment. Il resultat da la cumbinaziun, ch’è aposta vegnida creada per questa saira magica, preschentan els il 1. da december a las 20.30 en la Terma da Val. Las visitadras ed ils visitaders spetga in concert da 60 minutas cun suns classics calms cumbinads cun suns electronics en in ambient extraordinari. Insumma ina buna pussaivladad d’as laschar fascinar da la musica, da la culissa e da la glisch durant il temp d’advent. RTR porscha ensemen cun la Terma da Val in servetsch da bus da shuttle davent da la staziun da Glion enfin a Val ed enavos. Dapli infurmaziuns èn da chattar sin rtr.ch/purplenights. L’occurrenza è publica, l’entrada libra.

Livestream dal concert

Tuttina betg temp da vegnir a Val? RTR emetta il concert a partir da las 21.00 sco video-livestream sin rtr.ch, facebook.com/rtr.ch ubain via HbbTV/red button sin SRF1/SRF2.