Scolaziun per il stgalim secundar a Cuira

(cc) La regenza ha incumbensà la SAPGR da porscher ina nova scolaziun cumplementara a la professiun per il stgalim secundar I ed ha renovà l’incarica da prestaziun cun Grischun Vacanzas. Plinavant ha ella approvà in project da vias per reparar la via da Brinzauls. La Scola auta da pedagogia dal Grischun (SAPGR) vegn incumbensada da realisar en cooperaziun cun la Scola auta da pedagogia da Son Gagl dal 1. da settember 2019 fin ils 31 d’avust 2022 la scolaziun cumplementara a la professiun sco persuna d’instrucziun per il stgalim secundar I. Questa scolaziun sa drizza a persunas d’instrucziun ch’instrueschan actualmain sin il stgalim secundar I senza in diplom che correspunda al stgalim u che vulan midar dal stgalim primar al stgalim secundar I.

Per bleras vischnancas da scola dal Grischun èsi anc adina difficil da chattar persunas d’instrucziun per il stgalim secundar I ch’han in diplom correspundent. Las persunas d’instrucziun da la scola primara pon actualmain far la scolaziun cumplementara a la professiun sco persunas d’instrucziun per il stgalim secundar I mo a las scolas autas da pedagogia da Turitg e da Son Gagl. En spezial per persunas d’instrucziun da la scola primara en las regiuns periferas dal Grischun resultan temps da viadi fitg lungs, uschia che mo paucas persunas d’instrucziun fan diever da questa purschida. Ils scleriments preliminars che la SAPGR ha fatg la primavaira 2018 han mussà che 62 persunas han actualmain interess da far ina tala scolaziun.