La camona da Maighels el center

(anr/abc) Vendergis sera ei la «famiglia» dad alpinistas ed alpinists sursilvans s’entupada a Glion alla radunonza generala. La secziun Péz Terri dil Club Alpin Svizzer dumbra ussa 1800 commembers, da quels ein 130 separticipai alla radunonza. Cun plascher seigi el restaus fideivels, mussond solidaritad e perseveronza, ha Gion Battesta Degonda manegiau els paucs plaids ch’el ha drizzau alla radunonza. El e Roman Decurtins da Trun ein dapi 50 onns commembers dalla secziun, Georg Hefti da Flem dapi 60 onns. La gliesta dils undrai cun commembranza da 40 e 25 onns ei stada bia pli liunga, en tut ha il president dalla secziun Péz Terri legiu giu ils nums da 48 persunas. «Jeu sperel che tut quels muossien era ina tala perseveronza», ha il giubilar da Cumpadials concludiu. El ha retschiert applaus persuenter. La tractanda dallas undraziuns ei denton buca stada el center dalla 119avla radunonza generala dalla secziun Péz Terri.

Scamond per dunnas – tochen 1980

Sco quei ch’il president dalla secziun, Arno Arpagaus, haveva annunziau egl invit ei la moda dalla radunonza generala secumprovada. Gia la tiarza gada en retscha ei quella il davos vendergis dil november a Glion, ella sedia dalla secziun. Enstagl d’ina sonda suentermiezgi culla radunonza e la sera la tscheina appreziescha la maioritad che la radunonza ei limitada silla sera, ella ei cumbinada cun in referat ed in aperitiv pulpiu. Uonn ei la fotografa, autura e cineasta Caroline Fink stada envidada da presentar il svilup dallas dunnas el sectur digl alpinissem. Aunc avon quei referat haveva ina dunna dalla seziun ch’ei vegnida undrada pil commembradi da 40 onns rendiu attent ch’ella seigi stada igl onn 1978 fetg engrazieivla alla secziun Péz Terri, pertgei quella hagi buca refusau sia damonda da commembradi, malgrad che las dunnas erien lu aunc buca giavischadas el CAS. Pér dus onns pli tard, il 1980, ha ei dau ina fusiun dils dus clubs alpins, quel dils umens e quel dallas dunnas.

Oz dumbra la secziun Péz Terri varga 1800 commembers. Enteifer ils davos 20 onns ei il diember sedublegiaus. Sco quei che la menadra dallas mutaziuns, Marlies Jörger-Frei, ha explicau en sia statistica ei la cumpart dallas schlatteinas adina restada constanta, numnadamein ina tiarza dunnas e duas tiarzas umens.

Guido Wieland ha puspei saviu explicar in quen excellent. Las finanzas dalla secziun Péz Terri ein fetg saunas. Igl onn da quen 2017/18 ei ius a fin ils 30 da settember cun in gudogn schuber da 41 140 francs. Igl onn precedent fuvi stau ina summa da 29 684 francs. La secziun ha negins deivets sin sias camonas Terri e Maighels, omisduas s’audan tier las diesch meglierfrequentadas dallas camonas dil CAS. Grazia a guardiacamonas ch’ein fetg premurai e che valan sco excellents «hoteliers» ei quei il cass.

Camona da Maighels – 
serrada il 2020

Sco il cassier Guido Wieland ha declarau, vegnan las cefras ella contabilitad dalla secziun a semidar ils proxims onns. La renovaziun ed engrondaziun dalla camona da Maighels ei dapi onns in tema ch’ha fatschentau ina cumissiun da baghegiar. Ussa vegn il project finalmein ella fasa dalla realisaziun. La radunonza generala ha numnadamein approbau in credit da baghegiar da 2,4 milliuns francs. Ord ina concurrenza d’architects ei la proposta dad André Maissen da Sedrun resortida sco victura. El ha presentau alla radunonza il project. La camona vegn renovada ed engrondida, senza denton augmentar grondamein las capacitads. «Ei vegn a dar ina biala e buna camona, denton buc in hotel da muntogna», ha il president dalla secziun Arno Arpagaus puntuau. Il project sebasa sin ina capacitad cun 86 letgs en combras da differenta grondezia, stivas, locals annexs, cuschina ed infrastructura conforma al temps sco era ina terrassa cun 66 plazs. La substanza d’entochen ussa vegn a restar, la fuorma dalla camona vegn adattada al diever. La finanziaziun ei per gronda part segirada. Ord agens mieds sa la secziun realisar il project cun 450 000 francs, capital jester ei necessari cun ina hipoteca, plinavon garantescha la centrala dil CAS a Berna ina cumpart dad 800 000 francs. Aunc avon che la fasa da baghegiar entscheiva vegn la secziun a sanar la stad proxima la via viers la camona, la lubientscha da baghegiar leutier ei concedida. Igl atun 2019 entscheivan lu las empremas lavurs e la stad 2020 resta la camona da Maighel serrada pervia dil project grond da renovaziun.

Igl ei gest il dretg mument pils guardiacamona Pia e Bruno Honegger d’ir en pensiun e da surdar il menaschi a successurs. La radunonza generala a Glion ha priu cumiau dad els dignamein. Duront 27 onns ha la famiglia Honegger-Schmid menau la camona dalla secziun cun grond engaschi persunal. Sco successurs ha la suprastonza saviu eleger ord ina vasta gliesta da 20 dossiers cun candidaturas. Cun perschuasiun hagien ins decidiu da surdar il menaschi a Nora Honegger e Mauro Loretz. Il giuven pèr vegn a surprender l’incarica silla stad 2021.