«Nus lain bandunar l’areal da l’Obere Au»

(rtr) A la radunanza generala da la societad d’aczias da la halla d’ir a chaval èn ils acziunaris sa declerads pronts da bandunar avant che necessari l’areal Obere Au. Prevesì èsi da construir ina nova halla da chavaltgar a l’Untere Au visavi da l’ovra da gera e gist sper l’autostrada. La parcella previsa per la nova halla d’ir a chaval plascha als acziunaris. I sa tracta d’ina zona da bajegiar che tutga mumentan a la citad. I n’è dentant anc betg decidì sch’i vegn uschè lunsch. Tranter las duas partidas, la citad da Cuira ed ils chavaltgaders, stoi dar in cumpromiss davart la summa che la citad da Cuira paja per ch’ils chavaltgaders bandunian l’Obere Au pli baud che quai ch’els stuessan. Cunquai ch’il parlament da Cuira sto anc dar la benedicziun èsi segir ch’i sa tracta da minimum in mez milliun. Ch’i vegn tar in cumpromiss tranter las duas partidas è dentant probabel. Pertge senza cumpromiss stuessan ils chavaltgaders construir ina nova halla senza sustegn finanzial da la citad.