Pei da taglia resta
(anr/abc) Vendergis ha la radunonza communala da Breil, sco autoritad suprema dalla vischnaunca, approbau il preventiv dil quen current 2019. Ins preveda expensas dad 11 654 500 ed entradas da 12 419 519 francs, aschia ch’ei seresultass igl onn proxim in surpli d’entradas da 765 019 francs. Tier las investiziuns ein expensas bruttas da 3 960 000 francs previdas, cullas contribuziuns e subvenziuns resti alla vischnaunca cuosts nets 3 300 000 francs. Ina summa da 970 000 francs duei vegnir impundida pil sectur dil traffic. Previdas ein lavurs vid las vias communalas Crestas a Breil, Fundrels a Vuorz e la via da Darin. Ina summa da 600 000 francs ei previda pil provediment d’aua cun lavurs da manteniment ad Andiast, Vuorz e Breil. Tiels baghetgs da scola eis ei previu d’investar 230 000 francs. Ina summa da 635 000 francs ei budgetada il 2019 per la meglieraziun da Vuorz. Il pei da taglia pigl onn vegnent ha la radunonza schau sco tochen dacheu sin 100 pertschien dalla taglia cantunala sempla e la taglia sin schischom resta sin 1,7 promil. Il cussegl da vischnaunca haveva approbau dacuort las propostas da preventiv e peis da taglia per mauns da quella radunonza communala.
Gust da leger dapli?