Agen curaint par 
cargear autos electrics

(cp) La Hassler Energia Alternativa SA da Ziràn e egn’interpresa da pionier d’amprem rang partutgànt la producziùn d’energeia solara an Svizra. Davent digls 1985 porscha que manaschi da Schons, c’ocupescha radund 15 colavuraturas a colavuraturs, andrezs solar-termics cumplessivs par sustaner stgoldamaints a scaldar aua sco ear andrezs da produtgear curaint electric. Igls 2015 e la Hassler Energia vagnida undrada cugl Premi solar svizer par la sia lavur da pionier segl sectur da l’energeia solara.

La Hassler Energia e da preschaint spezialmeing loscha da la sia ple nova invenziùn: Egna staziùn da cargear autos electrics cun curaint solar. «Da cargear autos electrics cun agen curaint e propi fetg raschunevel», e la parschuasiùn da Christ-Andri Hassler, igl magnafatschenda da la Hassler Energia. Siànd la dumonda carschainta par vehicals electrics survean l’instalaziùn d’egna staziùn da cargear an tgeas privatas adigna daple muntada, «parquegl ca là stat igl vehical igl ple savens», argumentescha Hassler. Da cargear tals stgearps a tgea po sacapescha dabot augmantar igls custs pigl curaint. Parquegl sapaja la producziùn da curaint cun egn agen andrez fotovoltaic ad egn acumulatur propi par casadas cun egn auto electric.