Cun bus sin tura da skis

Dad Andreas Cadonau / ANR

Cun in bus per ils skiturs da turas lantschescha il Clup alpin svizzer cun ulteriurs partenaris in project da pilot a partir da miez december en sis regiuns alpinas. Porscher access a differents intschess da turas cun il traffic public. Denter las regiuns tschernidas per la fasa d’emprova sesanfla era il Pass dil Lucmagn. Il bus per ils skiturs da turas parta allas 06.55 naven da Mustér via Curaglia, Fuorns, Pardatsch entochen il Pass dil Lucmagn per contonscher Casaccia da tschella vart dil pass allas 07.33. Ei setracta dall’emprema da treis turas purschidas mintgamai la sonda e dumengia entochen ils 25 da december e silsuenter mintga gi entochen ils 6 da schaner per cuntinuar las fins dalla jamna. Sch’il bus da Taxi Demont da Trun parta definitiv sin ils termins indicai en la pagina d’internet schneetourenbus.ch dependa la finfinala dallas reservaziuns e sch’il Pass dil Lucmagn ei aviarts. Eugen Demont ha menziunau il sistem da reservaziun per il bus che funcziuna via la pagina dad internet. Mintga singula tura dil bus egl urari ei marcada cun il signal oransch. Retscheiva Demont avunda reservaziuns per la singula tura e lubeschan l’aura e l’avertura dil pass da far il viadi entochen Casaccia metta el il signal sin verd dus gis avon il termin da viadi. Verd munta ch’il bus da Taxi Demont ei semtgaus alla staziun da Mustér per carrar en direcziun dil Pass dil Lucmagn. Incaps a cuorta vesta ch’impedeschan il viadi dil bus vegnan communicai allas persunas ch’han reservau via e-mail. Benno Steiner, collaboratur dalla sparta per la protecziun dalla cuntrada enteifer il Club alpin svizzer, scriva en la novissima ediziun dil club dalla necessitad da promover igl access cun il traffic public ad intschess dad ir cun gianellas ni cun skis da turas. Beinduras maunca gest la davosa part dalla colligiaziun al territori da skis da turas per puder desister dil traffic individual, digl agen auto. En vesta all’impurtonza da contribuir alla protecziun dil clima, era per interess dad alpinistas ed alpinists, ha Steiner puntuau, seigi naschida l’idea da lantschar il bus per ils skiturs da turas.

Fasa da project

En tschun differentas regiuns han ils creaders il bus per ils skiturs da turas, sper il Clup alpin svizzer ein quei l’organisaziun per la protecziun dalla natira, Mountain wilderness, il Survetsch autopostal svizzer e la Scola aulta da Lucerna, contactau interprendiders privats da transport. Aschia ei la damonda era setschentada tier Eugen Demont a Trun ch’ei sedecidius da surprender l’incarica. El ei gia oz ina ga ni l’autra dumandaus da transportar alpinistas ed alpinists, sch’ei pertucca skiunzs da turas lu plitost viaden ella primavera, sco il possessur da Taxi Demont ha sincerau. Demont ei spanegiaus sin la damonda viers la purschida ed ha getg da far la tura era sche sulet duas persunas reservien. El spera da puder ulivar transports cun paucas persunas cun turas pli frequentadas. Gruppas che secumponan da dapli che otg persunas ston s’annunziar separat tier Taxi Demont. Demont carrescha sin quei tschancun cun in bus dad otg e sto organisar supplement sch’il diember surpassa la limita. Demont ei pli probabel buc il sulet che vegn a reponderar la purschida la primavera proxima. Il meinaproject Steiner ha annunziau da vuler analisar la damonda igl onn proxim per la finfinala decider da cuminonza cun ils partenaris da cuntinuar ed extender la purschida.

En tschun differentas regiuns

Sper la purschida egl intschess dil Pass dil Lucmagn cursescha il bus per ils skiturs da turas aunc sin tschun ulteriurs tschancuns en Svizra. In da Bivio al Pass Gelgia, in auter en Purtenza da Pany entochen St. Antönien, in ulteriur dad Ursera viers Caschinutta e Meiental ed in el Valleis dad Ernen viers Binn e Fäld. Ils territoris e las pusseivladads da far turas ein presentai sin la pagina da reservaziun ed en mintga liug ein interprendiders privats engaschai da porscher ils viadis. Grazia al sistem da reservaziun e sia filosofia da schar cursar il bus sulet sche la damonda ei avon maun ein ils prezis da viadi favoreivels. Quei manegia il meinaprojet Steiner en sias explicaziuns en l’atgna publicaziun. In viadi dalla staziun da Mustér entochen da tschella vart dil Pass Lucmagn cuosta 28 francs. Il project vegn sustenius dil Secretariat statal per economia e dils cantuns Grischun, Berna e Valleis.