D’evenimaints misterious e daple

La redacziun dalla Revista digl noss Sulom è sa messa per l’ediziun actuala alla tschertga da detgas localas. La racolta è stada pi gronda tgi cartia. Gio durant sgultrar ainten igls codeschs ed archivs è sa musso tgi las nossas valladas èn retgas da tot las sorts istorgias e rachints misterious. Ena schelta da tals evenimaints misterious pudez liger ainten la Revista digl noss Sulom actuala.

Scu unfants ò bagn l’egn u l’oter da nous gio tadlo cun ureglias gizzas agls rachints dallas violas da Faller, dalla tgesa arsa u er dalla narra dalla fava. Ma cugl taimp èn chellas detgas eidas an amblidanza. La Revista digl noss Sulom ò sgultro ainten igls codeschs vigls e visito danovamaintg igls lis misterious. Anc oz on bleras dallas istorgias viglias betg pers da lour brisanza litterara e psicologica.

Retga cultura

Ainten la Revista digl noss Sulom vign preschantada angal ena fitg pitschna part dalla retgezza da detgas tgi las nossas valladas possedan. Ma i sa mossa tgi gist an regiungs periferas croda la fantascheia sen tarratsch fritgevel. Strousch ena vischnanca tgi na po betg rachintar d’egn u l’oter evenimaint misterious. I para scu schi las seiras lungas vessan purschia la tribuna ideala per streias, violas u otras creaturas misteriousas.

En tschintgetg custevel

La redacziun dalla Revista digl noss Sulom ò catto sper ena vasta paletta da detgas er ena bela racolta da texts an idioms locals, seia chegl ena detga an lungatg da Lantsch u en rachint an lungatg dad Alvagni. Chella racolta litterara fò or dalla Revista digl noss Sulom er en tschintgetg ideal per tot chels tgi ligian gugent igl pled rumantsch an tot la sia diversitad. An vista allas seiras lungas digl anviern pudess en abunamaint dalla Revista digl noss Sulom delectar gioven e vigl.

Cuntinuitad e qualitad

Tgi tgi sfiglia tras la Revista digl noss Sulom vign er a cattar scu figl separo en 
pitschen questiunari. La redacziun e l’editoura (Uniun Rumantscha Grischun Central) lessan santier igl meini digls lectours e dallas lectouras tar la Revista digl noss Sulom. Chella cumpara ossa gio per la 7avla geda an vistgia da revista.

Per la redacziun tgi sa cumpona dall’antschatta davent da Pia Plaz, Dominique Dosch e Rafael Müller ègl impurtant da santeir igls basigns da lour lectours e lectouras, perchegl è mintga critica u remartga bagnneida. La fegnameira dalla redacziun è da pudeir preschantar mintga mez onn ena revista tgi porscha ena lectura captivonta per gioven e vigl.

Alla tschertga d’en tschintgetg da Nadal?

Abune la Revista digl noss Sulom per angal 25.50 francs ad onn per dus ediziuns.

Pustaziuns via: administraziun@sulom.ch

Pia Plaz