Engiadina Bassa fa promoziun eir per Zernez

(anr/fa) Da prümavaira vaivan decis ils da Zernez e Brail da vulair far part turisticamaing da la destinaziun Engiadina Bassa Samignun Val Müstair. Uossa es gnüda surdatta la clav per l’infuormaziun dals giasts i’l center dal PNS. Fin d’incuort collavuraivan Zernez e Brail in quai chi reguardaiva il turissem cun l’Engiadin’Ota. Da prümavaira ha lura decis il suveran da vulair far part tant geograficamaing sco eir turisticamaing da l’Engiadina Bassa. A temp pel principi da la stagiun d’inviern sun uossa rapreschantadas eir las fracziuns Zernez e Brail illa comunicaziun turistica da l’Engiadina Scuol Samignun Val Müstair SA (TESSVM). Fingià ün pêr mais avant il cumanzamaint ufficial da quista collavuraziun vaiva il team da la TESSVM cumanzà a preparar l’integraziun da Brail e Zernez in lur comunicaziun turistica. Quai hana fat in cooperaziun cun Fabian Schorta, il coordinatur turistic dal cumün da Zernez. «Las duos fracziuns s’affan fich bain cullas sportas turisticas existentas da l’Engiadina Bassa e cumpletteschan perfettamaing la Regiun dal Parc naziunal», ha dit Martina Stadler, la directura da la TESSVM, in lündeschdi a chaschun da la surdatta da la clav pella nouva infuormaziun pels giasts chi’s rechatta a Zernez i’l center dal Parc Naziunal Svizzer (PNS). Causa l’integraziun dal cumün da Zernez esa dvantà necessari d’adattar ils noms: La destinaziun lavura in avegnir cul nom «Engadin Samnaun Val Müstair» e la subregiun Engiadina Bassa cun «Engadin Scuol Zernez». Las otras duos subregiuns comunicheschan inavant cun «Samnaun» e «Val Müstair». La domena da scuol.ch es gnüda adattada sün scuol-zernez.com.