Giurista musicala

DA GION NUTEGN STGIER / ANR

Ena concurrenza da nivel fitg ot, buna ambianza, dominanza dallas musicantas e digls musicants dalla Nagiadegna ed ena giurista scu victoura. Chegl è resumo curt la 27avla ediziun dall’occurrenza grischuna per solists ed ensembles. Igl 1991 èn s’inscuntros musicants e musicantas digl antier Grischun all’amprema ediziun dalla concurrenza cantunala per solists ed ensembles. Aint igl frataimp ò chella occurrenza igl sies post fix all’antschatta da december. Igl event da musica è er en maletg dalla buna lavour dallas scolas da musica e digl angaschamaint dallas vers 100 societads da musica tgi vagn aint igl Grischun. President dalla concurrenza da musica è Flavio Sterli da Savognin. El veiva prest de e notg per la musica, el è fitg activ ed angaschea e vetiers ena persunga cun en carisma singular.

Ple tgi la mesadad dalla Nagiadegna

Sterli deplorescha fitg tgi igl interess per l’occurrenza vign dad onn tar onn pi pitschen. Chegl seia tuttegna remarcabel, pertge alla basa vigna fatg buna lavour per promover la musica, dei el. Davart dallas scolas da musica vess da neir daple iniziativa per la concurrenza grischuna per solists ed ensembles. Ena gronda excepziun seian cò las scolas da musica dalla Nagiadegna tgi animeschan musicants e musicantas da sa participar alla concurrenza tgi ò er sonda passada gia li a Coira. Digls 60 participants e participantas eran 40 dels dallas scolas da musica dalla Nagiadegna. Coira era strousch represchento, la Surselva angal cun en pêr musicants e musicantas ed igl madem vala er pigl Grischun central, la Purtenza e Tavo.

Fatg ena bilantscha positiva

Tiers la maira participaziun ò Sterli fatg ena bilantscha positiva dall’occurrenza. Igl nivel seia sto fitg ot, santia ins vegia producziuns da vaglia, musica fegna e gia ins vegia er en public angraztgevel. Sa musso cuntaint è Sterli er tgi Urs Marti, igl president digl martgea da Coira, è sto preschaint ed è sa mess a disposiziun per surdar igls premis. Er el ò angal catto bler lod, an spezial per las producziuns digls unfants e giuvenils tgi conferman tgi aint igl cantun vegia er la musica ena gronda muntada. D’en nivel fitg ot, da musica da qualitad e da producziuns sonoras discorran er igls dus musicists e frars Domenic e Duri Janett. Els vegian santia musica perfetga da solists, solistas ed ensembles, deian igls dus omens digl rom. I fetscha plascheir tgi unfants e giuvenils vegian a cor igl far musica, menziuneschan Domenic e Duri Janett e chegl seia plaschevel.

Ansomma betg simpel da giuditgier

Da musica da qualitad, da producziuns excellentas e d’en nivel angulivo discorra er Ruth Suppiger, ella tgi ò appartignia alla giuria da tschintg persungas. I seia sto tot oter tgi simpel da valetar e taxar las producziuns cun esser la gronda part da chellas interpretadas an moda perfetga. Chegl seia alloura er sto igl cass aint igl final noua tgi dus musicants e quatter musicantas èn sa preschentos alla giuria per erueir igl victour u la victoura. Vasia ins vegia igl antier de tgi tots participants vegian fatg musica cun plascheir, chegl tgi seia igl pi impurtant er per la motivaziun. An îgl è crudo tgi tranter igls seis finalists eran gist dus mattas ed en mat tgi on contanschia igl final cun persvader la giuria cun musica da flauta traversa da belezza. Digl reminent èn las dus mattas Madny Jong e Luana Texeira scu er igl mat Lawrence Beringer commembers dalla Scola da musica dalla Nagiadegn’Ota. Alla fegn ò la giuria tuttegna betg gia igl curasch da plazzar egn or da chel trio segl amprem plaz final. Sa misiro aint igl final è er Marchet Nesa, el tgi ò suno la battareia ed igl xylophon ed incanto igl auditori.

Musica e ballareit

Ad Erika Bearth-Bischof dalla Brass Band Surselva è betg reuschia da defender igl tetel gudagnea avant en onn. Daventada sia successoura è Andrea Eggimann dalla Societad da musica Jenaz. La giurista da 25 onns ò graztga alla sia tscherna digl toc Fantasia on Welsh Melody «Jenny Jones» da William Rimmer tscharnia ena melodia scu fatga per interpretar cugl euphonium. Ena prestaziun sonora, sobra, plagn calour e cun ena musicalitad e tonalitad excellenta dalla victoura Eggimann. La musicanta tgi ò ballareit scu sport preferia è stada surstada da gudagner la concurrenza. Plascheir vegia ella tuttegna dalla victorgia, dei la donna dalla Purtenza.