Informaziun cumpetenta e sperta

Da Hans Huonder / anr

Il chat direct ei in canal d’informaziun modern e cun grond potenzial. Ussa nezegian era organisaziuns turisticas quella via dalla communicaziun. Questa stad ei il project «Guuru» vegnius lantschaus. Igl ei aschidadir in project da pilot cun cundiziuns realas che vegn analisaus successivamein. Ina dallas empremas organisaziuns da turissem che porscha quel ei Sedrun Mustér Turissem. Igl ei in chat direct, vul dir ina plattafuorma digitala da communicaziun denter persunas che vulan saver enzatgei dalla regiun e persunas che san informar corrispundentamein. A moda individuala san informaziuns davart la destinaziun da vacanzas vegnir intermediadas cheutras enteifer cuort temps e quei duront 24 uras per di. Kerstin Sigron da Grischun Vacanzas e responsabla pil marketing da Sedrun Mustér Turissem sa gia plidar d’empremas experientschas positivas. Plirs tschiens chats ein gia vegni registrai e las notas che quels han survegniu ein bunas. Entras quella pusseivladad da communicaziun sa il persunal dall’organisaziun da turissem vegnir descargaus. Sigron ei perschuadida che quella fuorma d’informaziun ha grond potenzial. Las persunas ch’informeschan – ils aschinumnai «Guurus» – vegnan eligidas dalla destinaziun e silsuenter era scoladas.

Pagina 3