Prau la Selva, center dil patinadi

(anr/abc) Bia resuns per la concurrenza da patinadi artistic «Flims Trophy 2018» ha ei dau la fin d’jamna vargada. Tuts ein stai positivs. Schizun in’offerta da surprender l’organisaziun dil Campiunadi svizzer da patinadi artistic ha il Club da patinadi Flem-Surselva retschiert. La fin d’jamna han 280 princessas visitau il center da sport Prau la Selva a Flem. Tuttas ein separticipadas alla concurrenza tradiziunala da patinadi artistic «Flims Trophy 2018». Ellas hagien retschiert ina massa resuns positivs, resumescha Martina Clopath. La dunna da Haldenstein meina il comite tecnic ed ei coach da G+S dil Club da patinadi artistic da Flem. Ensemen cun sias collegas Mascha Hug, Katrin Blumberg, Caroline Gasser, Anita Zollet, Sandra Albin e Jürgen Panknin ha ella organisau la concurrenza «Flims Trophy 2018». Alla fin dalla «Flims Trophy 2018» hagien ils commembers dalla giuria rendiu attent ch’il Club da patinadi Flem-Surselva dueigi ponderar d’organisar in campiunadi svizzer. «Pil mument stuein nus prender tut dafertontier, igl ei nunpusseivel da planisar enzatgei», ha ella declarau el discuors cull’anr.

pagina 6