Claustra – 
Emblidà la 
chasa da parcar

La fin november han ils da Claustra ditg gea al ressort da famiglias «Ober Ganda», però senza la chasa da parcar. Cun preparar la votaziun haja la vischnanca da Claustra emblidà la chasa da parcar cun radund 430 parcadis. Quai scriva il «Bündner Tagblatt». Mancà en ils documents da votaziun haja il nov contract da dretg da construcziun necessari tranter la vischnanca e las pendicularas Madrisa. Uss ston ils da Claustra s’exprimer il favrer che vegn er anc davart la chasa da parcar dal project «Ober Ganda».

Ils ministers da finanzas da l’Uniun europeica han stritgà mardi ulteriurs pajais da la glista grischa per oasas da taglia: Andorra e San Marino. La Svizra percunter resta sin la glista grischa, uschia ch’il temp scada plaunsieu. L’UE aveva introducì avant in onn ina glista naira ed ina grischa. Quels sin la glista grischa avevan dà pled da far midadas tar lur praticas da taglia. Il cussegl federal leva realisar las refurmas empermessas cun la revisiun da la taglia sin interpresas, quella ha il suveran però refusà. Cusseglier federal Ueli Maurer ha lura uschè spert sco pussaivel lantschà in nov project da votaziun ch’è vegnì collià dal parlament vid la revisiun da l’AVS. Tenor il cussegl federal vegn questa chaussa dentant pir en votaziun il matg dal 2019. Ils ministers da finanzas da l’Uniun europeica vulan però gia decider il mars tgi che vegn stritgà definitivamain da la glista u tgi che vegn sin la glista naira. Pajais ch’èn sin la glista naira pudessan spetgar sancziuns da l’UE. Tut tenor vegn spetgà sin il resultat da la votaziun en Svizra avant ch’i vegn decidì sin livel europeic.

La sonda passada ha la Federaziun svizra d’emploiads festivà ses giubileum da 100 onns. A chaschun da quella festa ha l’organisaziun recepì in roboter sco commember. Sco simbol per la collavuraziun tranter carstgaun e maschina ha la Federaziun svizra d’emploiads recepì in roboter sco commember. Il roboter che sa numna «Pepper» è in uschenumnà roboter social. Quai munta ch’el interagescha cun carstgauns. Construì è il roboter da la firma giapunaisa da telecommunicaziun «Softbank». En la Federaziun svizra d’emploiads duai il roboter cunzunt procurar per discussiuns tranter ils commembers. Ins vul uschia prender als commembers uschè spert sco pussaivel la tema da la digitalisaziun e procurar per scleriment.