Introducziun dil 
cudisch funsil federal

(anr/hh) La radunonza communala da Trun ei vegnida orientada il gliendisdis sera davart l’introducziun dil cudisch funsil federal. Tenor il president communal Dumeni Tomaschett entscheivan las lavurs igl onn 2019. En special setracta ei da purificar servituds. El rom dalla procedura vegnan tuts proprietaris da terren envidai d’annunziar lur dretgs ch’els quentan d’haver. En cass dispiteivels vegn ina cumissiun da pacificaziun ad intermediar. Ils dretgs ch’ein oz gia impurtai el cudisch funsil salvan lur vigur. Quei mument ch’il register funsil federal ei introducius han mo pli dretgs impurtai vigur.

Vischinas e vischins han approbau unanimamein il preventiv pigl onn 2019. Il preventiv dil quen da gudogn e sperdita quenta cun expensas da 7,19 milliuns ed entradas da 7,03 milliuns francs, aschia ch’ei duess sedar in deficit da rodund 165 000 francs. Il gudogn avon amortisaziuns duess muntar a rodund 116 000 francs. La vischnaunca preveda da far investiziuns da 2,6 milliuns francs, las investiziuns netto duessen contonscher la summa dad 1,4 milliuns francs. Las pli grondas investiziuns pertuccan la via forestala el territori da Munt, la Via Campliun, maschinas communalas, sanaziun dalla canalisaziun e sanaziun dil stan da sittar. La canzlista communala Sandra Gautschi ha explicau ils detagls dil preventiv. Vischinas e vischins han decidiu unanimamein da laschar il pei da taglia sin 105 pertschien dalla taglia cantunala sempla.